نموسيه كحلى

شوية تفاصيل .. مالهاش لزمة

2012-02-17T16:58:00.001+01:00

تفاصيل صغيره فى حياتنا .. تفاصيل فى العادى وفى حياتنا اليومية مش بناخد بالنا منها، لكن لما بتضيع مننا بنحس بقيمتها وبتوحشنا. طبيعه البنى ادم اللى مش بيحس بقيمة الحاجة اللى فى ايده الا لو ضاعت منه، وغالبا لو رجعتله تانى ممكن ما يقدرهاش برضه. وبيفضل دايما الممنوع مرغوب، والبعيد عن المنال هو الأقرب للقلب والقريب السهل الموجود على طول هو الغير مرغوب فيه.

علشان كده بيقولوا فى الحب ان التقل صنعه، وتتقل على حبيبك يحبك أكتر، توحشه ويحس بقيمتك، ويحس قد ايه الدنيا فاضية من غيرك وان وجودك مهم وبيدى للحياة نكهه وريحة مميزه، بيخلى لحظات اللقاء مميزه لانه بيكون فيها لهفه وشوق، وبيخلى لحظات البعد كمان مميزه لانه بيملاها رغبه وشوق برضه.

التقل فى الحب يعني تمنع نفسك انك تشوف حبيبك وانت هتموت عليه علشان تفضل دايما فى عنيه مميز وفريد من نوعك، يفضل يحبك مهما العمر عدا بيكوا، ويفضل فيه حاجات صغيره وتفاصيل بيشتاقلها ومش بيلاقيها غير معاك انت بس.

مش هتغير علشان حد يحبنى!!

2012-02-15T22:47:00.002+01:00

كتير بنسمع الجملة دى من البنات "انا مش هتحجب علشان حد" "انا مش هخس علشان حد"

انا مش هغير فى نفسي علشان حد .. هو ده المفهوم اللى وراه اى جمله على نفس الوزن

انا ربنا خلقنى كده بعيوبى وبمميزاتى .. وخلق كل البشر زيّ فيهم "عيوب" ومميزات

اللى يقدر يحب عيوبه ويتعايش معاها هو اللى يقدر يخلى الناس تحبه بعيوبه زى ما هو

واللى مركز على عيوبه ومش شايف غيرها، ومش قادر يحس بمميزاته طبيعى جدا ان الناس كمان مش هتشوفها ومش هتحس بيها.

علشان كده ما تستغربش أبدا لما تلاقى واحده بتقلك .. انا مش هتغير علشان أى حد

مش بس لانها واثقه فى نفسها، لكن لانها عايزه الانسان اللى هيحبه يحبها وهو عارف عيوبها

يحبها بعيوبها ومميزاتها .. يحبها كلها على بعضها

لو مش محجبة .. مش هتتحجب علشانه، ويوم ما هتاخد القرار هتاخده علشان ربنا

لو بتشرب سجاير فهى برضه مش هتبطل علشان تعجبه .. يوم ما تبطل هيبقى علشان صحتها

لو تخينه فهى مش هتخسه علشان تعجب حد .. هو لازم يحبها بشكلها كده

لو شخصيتها فيها عيب .. لازم يستحملها بيه .. ويحبها بيه

لو بتحطط مكياج كتيير .. هيحبها بشكلها كده

ولو ما بتحطش حتى مكياج برضه يحبها زى ماهى

أجمل احساس فى الدنيا لما حد يحبك علشان انت كده

علشان بتغلط فى واحد .. اتنين .. تلاته ..

وعلشان بتتصرف بالطريقة الفلانية

وعلشان مهما كان فيك من عيوب فأكيد فيك مميزات ومش موجودة عن حد غيرك..

وعلشان هو شايف مميزاتك .. حتى اللى انت مش شايفها

وحاسس بيها .. وحاسس بيك

فى النهايه ما فيش انسان كامل

وزى ما انت الانسان اللى هتختاره وتحبه فيه عيوبه هتستحمله بيها

انت كمان فيك عيوب .. وهو لما حبك واختارك اختارك على بعضك

بعيوبك وغلطاتك .. وحسناتك ومميزاتك

ولان الحب ما بيكونش ليه اسباب واضحه ومحدده

القلب بيحب من أجل الحب .. ولسبب مجهول

العقل هو اللى بيفسر وبيحلل

وأنا بعلنها صريحه واضحة

أنا مش هتغير علشان حد

أنا كده وما فيش غير كده ما فيش حل تانى

لو عاجبك عاجبك مش عجبك شوف حد تانى :))

أشوفك كمان شوية :)

2012-02-05T02:41:00.000+01:00

بقالى 4 أيام ما شفتكش

بالنسبة لى .. كتير .. كتير قوى!!

خصوصا انى متعودة اشوفك كل يوم

متعودة ابص جوا عنيك كل يوم

4 ايام بحالهم فاتوا .. ما اعرفش فاتوا ازاى؟؟

الشيء الوحيد اللى كان بيصبرنى على بعدك هو صوتك

صوتك الى كان بيربطنى بالدنيا .. اللى كنت بتلكك علشان اسمعه

وفاتت الايام .. وفاضل ساعات وهشوفك

بيفصلنى عنك بس سواد الليل ..

مجرد ما هنام وافتح عنيا ويكون بكره جه

هيكون لقاك خلاص .. قرب هو كمان

بس اعمل ايه فى نفسي بقى

من كتر اللهفه والشوق مش عارفه انام

عيني مش مطوعانى .. ولا حتى قلبى

عماله افكر فيك .. وافكر فيا

وافكر هو انا ليه اصلا بفكر فيك

ده انت خلتنى فى نص الليل اقوم من السرير

اعمل كوباية كاكاو بلبن

واشغل عبد الحليم ..

واكتبلك جواب .. على نغمات أغنية جواب

جواب مش عارفه اكتب فيه ايه

بس يعني .. اهو شوية كلام بشاركك فيه

يمكن تحس شوية بالحاجات الغريبة اللى بدأت أحس انا بيها

يمكن لما اكتبلك كده اهدى شوية واعرف انام

انام علشان ساعة لقاك تيجي بسرعه

علشان وحشتنى .. وحشتنى قوى

ضحكتك .. ورخامتك عليا .. هزارك وهدوءك وكلامك ..
وكده يعني

واهى شوية ساعات .. هتعدى يعني هتعدى

أشوفك بقى كمان شوية :))

واتفضل اسمع

ماحدش هيباركلى بقى؟؟ :(

2012-02-03T21:15:00.001+01:00

مبروك يا أسماء

مبورك يا آية .. ربنا يتمملك بخير

الف الف مبروك يا هبه، وعقبال ما نشيل ولادك قريب

مبروك مبروك مبروك .. يا !!

كل يوم والتانى ادخل على الفيس بوك ابارك لفلانة وعلانة اللى بتتخطب واللى بتتجوز واللى بتخلف

ودايما الرد اللى بيجيلى كل مره .. عقبالك يا دعاء كده ان شاء الله :O

وردى بيكون ....................................................... :S

نفسي فى مره لما اكتب لواحده كومنت يبقى الرد الوحيد المتاح قدامها

الله يبارك فيكى ..

ولو حبه تزود تحابيش يبقى ما تلاقيش قدامها غير .. انتم السابقون ونحن اللاحقون.

نفسي اكتر من كل ده ان حد يباركلى فى مره لما اغير ال "ريليشن شيب ستاتيوس Relationship Status " بتاعتى فى يوم من الايام وفى ليلة من ذات الليالى.. واقفل الجهاز واروح انام .. اصحى الصبح الاقى 100 نوتيفيكشينز Notifications

تتنوع ما بين مبروووووووووووووووك والف مبروك وربنا يتمم بخير .. و آيااااااام سو هابى فور يو والكلمتين دول يعني

يعنى نفسي اكون لمرة واحده مكان اللى بباركلهم .. اكون انا اللى فرحانه وهما بيمثلوا انهم فرحانين لفرحتى

اكون انا مرة بؤرة الحدث واهم شخص فيه ..

واقول لوحده منهم .. عقبالك كده ان شاء الله :P

يبدو فيما يبدو انى بدات اوصل للسن الخطر ده، السن اللى بيجيله افكار سوده كتير وكوابيس .. السن اللى بيحسوا فيه باقتراب الخطر وبيشموا ريحته من على بعد كمان

وكمان شوية هتحول لواحده من عواجيز الفرح

هحط ايدي على خدى واديها أكل وأكل وأكل ..

وشوية شوية .. حاجات جوايا هتبدا تتغير .. وتقع .. مع التقادم بقى

بفكر اعمل مدونة جديدة اكتب فيها عن المرحلة العمرية الانتقالية المهمه قوووى اللى جايا دى :)

اهى حاجه تطلع اللى جوايا بدل ما أفرقع :$

الموت أصبح قريب .. قريب جدا

2012-02-02T13:20:00.002+01:00

أصبح الموت قريبا، قريبا جدا، أقرب من اى وقت مضى.

فى كل مرة سأغادر المنزل سأنظر له مودعه فربما تكون آخر مرة أدخله.

وفى كل مرة سأترك أمى وأبى لأذهب الى عملى سأقبل يدهم بخشوع على أمل ان يسامحونى على كل أخطائى التى ارتكبتها فى حقهم، فربما تكن هذه هى اخر فرصه لى لتوديعهم وتقبيل ايدهم.

فربما يكون اليوم هو الاخير لى فى هذه الدنيا، فالموت اصبح قريب.

اجد رائحته فى كل شيء حولى، رائحة الموت .. رائحة الموت.

ذلك البرد الذى يغلف قلوبنا .. الحزن الذى ما عاد يفارقنا.

دموع امهاتنا كل يوم فى وداع ابنائهم، وداعهم لمجرد انهم فارقوا حضنهم وليس لذهابهم الى الحرب كما كنت نعرف قديما.

انه الوداع الذى اصبح محتوما ومكتوبا على كل مصري، لا ندرى متى يحين موعدنا لنلتقى بأخوتنا "المصريين" الذين سبقونا للسماء.

متى ستنتحب عيون وقلوب لفراقنا، ومتى سترفع كؤوس النصر لاخرين يحتفلون فوق دمائنا.

سأذهب لعملى لاسير فى نفس الشوارع التى امشى فيها منذ زمن، لكن هذه المره ساتوقع هؤلاء الرجال بنجومهم الباهته ونسورهم الضاريه وهى متربصة بخطواتى وخظوات اخواتى .. وذنبنا الوحيد اننا طالبنا بحرية ان نحصل على حريتنا.

سأسير فى الشوارع القديمة لاجدها باهته يملأها الضباب، خالية من الألوان، فكل ما كان يبعث على الفرحه وكل من كان يساهم فى رسم البسمة قد مات، ومن تبقى حى لم يمت يقف فى طابور الموت ينتظر دوره.

لم يعد الحديث عن حب أرض او وطن او تراب، لا علاقة له بقصص التاريخ والبطولات المأثورة، لقد اصبح الثأر الأن شخصيا بين كل مصري وبين هؤلاء الذين قتلوا وتلوثت ايديهم وقلوبهم بدمائنا الزكية، فمن قتل ابى واخى وابنى لن اتركه ينعم بحياته هانئا وكانما قتلهم فى احدى العاب الكمبيوتر، فيغلق جهازه عند الانتهاء من القتل ويذهب ليحتفل بالفوز بين اصدقاءه.

سأظهر له فى اجمل احلامه لاحولها جحيم، سيجدنى امامه اينما نظر، ساجعله يشعر بالموت ويشم رائحته، فليعيش فى ذلك الخوف الذى جعلنا نحيا فيه سنوات، بل سأجعله يتمنى الموت ولا يدركه.

انا الوطن، انا الارض، انا الشباب الذى مات من اجل حلم، انا الحياة التى ستفارق كل من عادانى

ما أقدرش أقول انى بحبه

2012-01-29T00:09:00.000+01:00

ما اقدرش أقول انى بحبه لان الحب المفروض انه اكبر من كده بكتير ..

لكنه شاغلى بالى وفكرى .. بقيت بفكر فيه كتير قوى

بكلمه كتير، وبحلم بيه .. وبتخيل كل حاجة بعملها وهو جنبى فيها ..

برسم صور من خيالى وارسمه جنبى فيها ..

بغير عليه من خياله وهو معدى جنبه ..

بغير عليه من اى عين غير عيني بتبص عليه ..

بحب اشوفه .. بحب اكلمه .. بحب اكون معاه

بفرح قوى لما بسمع صوته بيقول اسمى

بفرح لما يعمل حاجه كنت قيلاله عليها

بفرح لما احس انى أثرت فى حياته او فى روتين يومه باى شكل

بفرح لما احس انه ممكن يكون عمل حاجه افتكرنى بيها وانا مش معاه

بتمنى اسيبله بس شوية ذكريات فى كل مكان بيروحه

على امل انه يفتكرنى بيها ويشم فيها ريحتى فى كل مكان

فافضل على طول فى باله ..

بحب سيرته وبحب اتكلم عنه قدام كل الناس

وادارى فى عنيا علشان ما تفضحنيش وتبين صورته جوايا

وبكدب على كل الناس واقنعهم انى ما بحبش حد

اه .. اه .. علشان انا فعلا ما بحبش حد

انا بس بفكر فيه .. وبتشغل عليه .. وبحتاجله كتير

برتاحله .. وبطمنله وبفرح بيه ومعاه وليه

ما اقدرش اقول مع كل ده برضه انى بحبه ..

انا معجبه بيه . نفسي احبه ..

او بفكر احبه .. او قربت احبه .. يعني هو فيه مشروع

ومش كل المشاريع بتنجح .. فى الغالب ما فيش حاجة بقيت بتنجح

بتفائل لما بشوفه .. وبحس بالامل ..

وبحس ان ممكن بكرا يكون احسن

وبقوله كلام بتمنى لو اقوله لنفسى .. واصدقه واعيشه

وبشيل حوايا كلام اكتر ببقى نفسي لو اقولهوله

وبخاف لو اقوله اتفضح ويبان اللى مدارى جوايا

بخاف منه .. بخاف لقلبى يتعلق بيه

خايفه انى فى يوم من الايام احبه بجد

وانا بخاف من الحب .. ومش عايزه احب حد ..

لان قلبى لو اتعلق بحد هيتعب قووووى

والدنيا لوحدها متعبه ..

فياما يحبنى هو كمان قوووى ..

يا اما هفضل خايفه اسلمه قلبى .. وهفضل واقفه على الباب

ولان تقريبا كل الولاد ما يتصدقوش اليومين دول

ولان الحب الحقيقي بقى كنز نادر الوجود

ولان الاحلام مصيره تفضل احلام زى ما هى كده

فخلينا واقفين على الباب

بنحب من بعيد لبعيد ..

بنكتب ونتكلم مع نفسنا

بنحلم .. ونغمض عنينا

ونحب فى صمت

دنيا زى الخلاط

2012-01-26T00:39:00.000+01:00

وكأن قدرى اعيش فى حيرة على طول، وتفضل حياتى متاهه جوا متاهه اخرج من واحده ادخل فى التانية، ما اقدرش اتنفس شوية واعيش الا لو كنت جوا المتاهه، ومن دى لدى واهى كده بقت حياتى.

كل مرة بتوه اكتر من اللى قبلها، بتأكد من حاجات كنت شاكه فيها، ومن شدة التاكيد بشك فيها، وبشك فى حاجات كنت متاكده منها زمان، ومن كتر الشك تعبت و بقيت اصدق اى حاجه.

لسه زى زمان قلبى قلب طفلة صغيره بيضحك على اى حاجة، وعندى استعداد اعيش ونفسي اضحك، لكن زى العادة الدنيا ما بتديش حد كل اللى بيتمناه، اه انا عايشه، لكن الدنيا مش راديه تدى قلبى فرصة يضحك ببرائه، مش موافقة تدينى فرصه افرح زى باقى البشر، وكل ما تديني حاجة حلوة تخطفها منى بسرعه.

بتدخلنى فى متاهات تضيع من عمرى حاجات حلوة كتير، وتخطف من جوايا النور والأمل .. وتسيب شوية جدران محطمة و مكسرة، تاخد من جوايا النور وتسيب مكانه الضلمة والبرد والخوف، وتخطف احلى سنين عمرى واجمل أحلامى وتسبنى وحيدة بفكر فى الف حاجة وبحاول احسبها يمين وشمال واجبها كده وارجعها كده .. لكن لسه بعيش فى متاهه مش مديانى فرصه افكر فى نفسي لدقايق.

متاهه او دوامة، ممكن حتى نسميها خلاط!!

المهم ان كل حاجه بقيت داخله فى كل حاجة وما فيش شيء لسه باقى فى مكانه. الضحكة اختفت وبقى مكانها ابتسامة بهتانه ما بتعديش حاجز الوش والشفايف، ولا يمكن توصل لقلب اى حد لانها فى الاصل مش خارجه من القلب ولا حتى قربت منه.

والقلب تحسه عجز 1000 سنة وهو محسوب على عمر البشر لسه فى عز شبابه، لكنه شايل هموم، حتى لو الناس شيفاها كلام فاضى لكنى مش مستحملاهم.

الواحد بتجيله لحظات فى حياته يحس فيها برغم قوته .. انه ضعيف. ويحس ان وحدته اللى هى اقرب ليه من كل البشر بقيت سخيفة وتقيلة ومملة. ويحس انه خايف من وجوده وسط الناس، خايف ان حد يستغل نقط ضعفه ويكسره اكتر ما هو اصلا مكسور من جواه. بيحلم وعنده امل انه يلاقى حد يساعده ويقف جنبه وياخد بايده ويمسح عن قلبه الوجع. وبيختفى الأمل كتير لما الدنيا بتجيب الواحد شوية شمال وشوية يمين، وتمرجحه كانه ما لوش ارض يقف عليها، ولا حد يمسكه ويسنده.

انا بقى عايشه فى الخلاط ده، وكل يوم بحال .. الدنيا بتلعب معايا لعبتها صح وزيادة، وانا واقفة بتفرج مش قادرة اتحرك .. كانى متثبته بسمامير فى الارض .. شمال .. يمين .. فوق .. تحت .. تشوفنى تقول جبل واقف وما تعرفش ان من جوايا كل شيء جوايا بيبكى .. بيصرخ من غير صوت .. بيقول كفااااااااااااايا .. انا تعبت.

ايوه انا تعبت، انا مش لعبه فى ايد حد حتى لو حد مش موجود، انا مش بتاعت حد الا نفسي ولا حد هيحبنى قد ما انا هحب نفسي .. ايووووه انا بحاول افك المسامير، ايووووه انا لازم اتحرك .. لازم تسمع صوتى وانا بصرخ، لازم تشوف دموعى .. لازم تحس انى ضعيفه .. انى مش جبل واقف ترمى الناس عليه كل اللى بيتقلها علشان تعيش هى خفيفة .. انا كمان واحد ناس زى باقى الناس دى .. عايزة ارمى كل حاجة ورايا واعيش خفيفة برضه. عايزه احس بضعفى مع حد بيقوينى، احس ان لسه فيه حاجات حلوة موجودة فى الدنيا، وان مش كل شيء بقى مخيف زى ما انا شيفاه.

الوداع حبيبي

2012-01-13T12:36:00.000+01:00

لم اتمكن من وداعه رغم انى كنت اعرف جيدا انها اخر مره سأراه فيها، فغدا انا راحله، سأترك المدينة كلها واذهب الى مكان جديد لا يوجد هو به لعلى اتمكن من البدء فى حياتى من جديد، سأتركه رغم حبه المتملك من كيانى لأتركه يحيا فى هدوء دون اى ضغوط قد يسببها وجودى فى حياتى، وأتركه على أمل ان اجد انا ايضا بعض الهدوء الذى افتقدته كثيرا فى الفترة الاخيره من علاقتى معه.

احيانا يصبح الحب عبء على حياتنا رغم كل ما يحمله من جمال ومعانى واحاسيس، فنعم انا احبه وهو يحبنى وكلا منا يدرك ذلك جيدا لكن رغم ذلك لا نتمكن من الحياة معا لاسباب كثير، بعضها يعود لغبائنا وتمسكنا بالكبرياء الاعمى الذى يقف حائط بيننا يبعدنا كل ما اقتربنا، واحيانا آخرى بسبب شدة حبنا نخشى ان نؤذى بعضنا، أفضل أن أتركه فى أشد لحظات الرومانسية وارحل أخشى عليه فى ضعفه ان يقول ويفعل اشياء يندم عليها لاحقا، اخشى ان يعدنى باحلام عريضه ادرك جيدا انه لن يتكمن من تحقيقها، فأخاف عليه من احباط وحزن قد يصيبه اذا فشل فى اثبات قدرته امامى، ويفعل هو بالمثل معى، يتركنى اذا ما وجد حبه ازداد وارتفع بداخلى يخشى علي من لحظة نفترق فيها اكون فيها اتنفس بوجوده فاموت او امرض اذا ابتعد عنى، فيفضل ان يعطنى تلك المساحة لكى اعتاد على الحياة والتنفس بدونه.

وهكذا انا وهو فى علاقتنا نبتعد عن بعضنا اكثر مما نقترب، نعذب قلوبنا بايدينا ونقنع نفسنا ان العذاب بايدينا اهون كثيرا من ذلك العذاب الذى يأتى بقوى خارجية دون ارادتنا، فنحب ويقتلنا حبنا، فلا نحن نستمتع بوجودنا فى قصة حب ولا نحن كباقى الناس ذوى القلوب الفارغه المشتاقين لدفيء الحب، فان سالنى احدهما ايهما أفضل الحب ام عدم الحب لا استطيع ان أجيب، وحقا لن أجد الاجابة، ففى قصتنا لا ادرى هل انا فى قصة حب ام لا!!

ولذا قررت ان اتخذ القرار بيدى هذه المره، قررت ان اتركه واترك كل ما له علاقة به او باى شيء يربطنى به الى الوراء وان احاول ان امضى قدما فى تلك الحياة، مدركه تمام الادراك انه ولابد ان تمضى الحياة، فلتمضى بقليل من الآلم ان امكننى ان اتحكم في كميته، وعلى يقين ايضا ان ايامى الاولى فى الغربة، ستكون هى الاصعب فى حياتى وهى الامتحان الحقيقي لقدرتى على التحمل، فهذا هو العذاب الذى نختاره بيدنا كما يخبرنى دوما وان هذا النوع من العذاب يمكننا تحمله مادام انه قادم من ارادة خالصه بداخلنا.

لكنى اعلم ان الغربة بداخلى ستزداد، فغربتى هى البعد عنه، نعم اعشق الأماكن الجديدة واهوى التعرف الى اشخاص جدد كل يوم ولا املهم ولا اخاف من الوحدة بعيدا عن الأهل والأصدقاء لكنى اخاف ان احيا بدونه، لكن هذه المرة يجب ان اتحلى بالقوة التى تخليت عنها سنين طويلة، فان كنت اريد ان احيا ما تبقى من حياتى فى هدوء، اذا اردت ان احاول البدء فى الحياة بصورة طبيعيه كما يفعل الكثير من الناس من حولى يجب ان اتحمل كل ما اعانيه.

انظر الى عينيه وهو يتحدث عن لقائنا غدا مع أصدقاءنا، واجاريه فى الحديث بقلب مفطور، احاول ان اودعه بكلمات مقتضبة ودموع محبوسة، اخشى ان يفهم ما وراء حديثى وفى نفس الوقت يقتلنى ان ارحل دون وداع، لكن فى هذه اللحظة الحاسمة يجب ان اتمالك نفسي ان اردت لخطتى النجاح، يجب ان اترك الحنين والرغبة فى القاء نفسي بين احضانه جانبا الآن.

سأرحل واتركه يواجه الحياة بدونى لأول مرة، وارحل لأواجه الحياة بدونه لأول مرة، لنرى ان كانت ستسمر الحياة .. وحتما ستستمر.

مجرد عشيقة

2012-01-12T14:31:00.000+01:00

وأظل دوما عشيقته التى لا يستغنى عنها ولا يستطيع ان يظل بجوارها اكثر من بضعه ساعات فى اليوم.

نمضى معا تلك الساعات الخاطفة فيشعرنى انه لن يتركنى لارحل وبانه لا يستطيع ان يحيا لحظات بدون وجودى فى حياته، وبعد ساعات قليلة يمللنى ويسألنى ان اذهب فلديه امرأه غيري ليعود اليها، امرأة اخرى تحتاجه ولا يستطيع هو ان يتخلى عنها من اجل ايا من النساء.

لا اعرف ماذا اعنى له وما هو دورى فى حياته؟؟ وكيف يتمنانى ولا يتحمل دلالى عليه فى بعض الاوقات عندما امثل امامه انى سابتعد ولن اعود الى احضانه من جديد، وكيف يتركنى بعدها ليذهب لاحضان امرأة آخرى.

اعرف انه متأكد من عشقى له وانى مستعدة ان اظل على هذه الحالة من الوصل والفراق ولن أمل منها ابدا، فهو يعرف كم اعشق فكرة وجودى فى حياته باى صورة من الصور، سواء اكنت انا الاهم بين النساء فى قلبه او كنت اخر اهتمامته، ففكرة وجودى فى حياته هى احد اجمل احلامى، بعدها تصبح باقى الاحلام متساوية.

يطلقون عليا لقب مجنونة، ويتسائلون كيف اعشقه وكيف اتقبل فكرة وجوده بين احضان امراة غيرى بهذا الهدوء والسكينة، يتسائلون ويتهامسون من حولى كثيرا، معتقدين انه ولا بد من وجود ذلة او مشكلة تجمعنى به ولا تجعلنى قادرة على تركه والحياة بدونه.

لا يدركون انى لست بهذا الهدوء الذي يظنونه وانى اموت فى نفسي كل ما تخيلت نظراته تلك بكل ما تحمله من حنان وهى تنظر الى امراة غيرى، وكل ما تخيلت ان قلبه الذى اذوب فيه عشقا تدخله غيري من النساء وانى لست الوحيدة الموجوده فيه كما هو الحال فى قلبى الذى لم ولن يدخله غيره من الرجال، وعندما اتخيل يده وهى تلمس امرأة غيري وانا دوما اترقبها من بعيد اتمنى فقط ان اسلم عليه لتضم يدي يده لحظات اشعر فيها بدفئه. لكن هذا العذاب الذى اعيشه هو سبيلى الوحيد للبقاء بجواره، للبقاء فى حياته، للبقاء على قيد الحياة.

ان احصل على لقب عشيقته، عشيقته التى لم يلمسها ولم يمارس معها الجنس كما يدور فى خلد الكثيرين عن لقب العشيقة، انما انا عشيقته التى يمضى معها الوقت فى حديث رقيق عن كل ما يمكن الحديث عنه فى الحياة، عن مبارة كرة قدم، وعن كتاب قرأناه وبعض ابيات شعر نتذكرها سويا، نتحدث عن مستقبل لا ندرى ملامحه، يحلم باشياء تخصه ويشاركنى فى نقلها، لا يضعنى على خريطة احلامه ولا يطردنى كذلك، انما يجعلنى اتسائل مائة سؤال دون الحصول على اى اجابات.

اظل عشيقته التى يتأمل فى عيناها بذلك الغموض فلا أفهمه، هل هو نوع جديد من الحب ام تعجب من حال امرأه "مجنونه" تمضى عمرها دون اى أمل فى حياة مستقره كباقى النساء، تمضى عمرها من اجل الوجود فى حياة يوجد هو بها.

ورغم يقينه انى احبه، انى اكثر من احبه بكثير ... فانه لا يقدم على خطوة اكثر من الكلام والنقاش، التأمل والتعجب والصمت، يمارس هواياته المفضله فى الهروب من قلبى، ويذهب لآخري تعطيه ما يريده ليجبر نفسه على عدم الاستسلام الى حبى. او ليقنع نفسه انه غير مخلص فى الحب فلا ينبغى عليه ان يكون لأمرأه واحده ويظل ينتقل فى علاقاته من واحده الى اخرى ليظل يبنى فى تلك الحائط الغريبة التى تفصله عنى.

اعتقد انه يحبنى، ولماذا الاعتقاد!! بل انه احساس بداخلى انه يشعر بشيء من الحب تجاهى لكنه يخشى الاستسلام للحب كغييره الكثير من الرجال، يعتقدون ان الحب ضعف واستسلام، وان من الرجولة الا يحب كى لا يشعر بذلك الضعف، يخشون ان تتملكهم المرأه اذا ادركت انهم يحبونها فيفضلون ان يتملكوها هم فى رحلتها للحصول على حبه.

ورغم كل شيء ليس عنده استعداد ان يفقدنى، فحين ابتعد عنه قليلا فى محاولة لجعله يعترف بحبي ويدرك انى لابد وان اعتلى مرتبه اعلى من مرتبه العشيقة ما يلبث ان يهفو الىّ بشوق لا يستطيع ان يداريه وعندما يلحظ ابتسامتى المستمتعه بلهفته يتراجع سريعا لنبدأ من جديد حديثه عن معجباته والنساء من حوله، واعود انا لمكاناتى السابقة التى لا اتعداها ابدا، مجرد عشيقة يعود اليها عندما يشتاق، عندما تظلم الحياة له وتعطيه ظهرها ..

امرأة عاشقة

2012-01-06T22:44:00.002+01:00

لا تعبث مع امرأه عاشقه

فالمرأة عندما تعشق تعطى دون ان تنظر الى مقابل

تضحى دون ان تفكر فى خسارتها

انها تحب، فيتخلل الحب كل ذراتها وخلاياها واجزائها

تراها امراه مشعه تجد الحب فى عينيها اينما رأيتها

تشعر برائحة الحب اذا ما مررت بجوارها

تجدها مبتسمه فى هدوء ورضا

ان الحب يعطيها طاقة رهيبة على التحمل والصبر

تظن انت انها لا تبالى لكنها بداخلها تعلمك الصبر

لان الحب هو اكبر مدرسة للمرآة يعلمها دروسا لا توجد فى الحياة

لكن لا تفكر فى العبث مع تلك المرأة

فهى مع كل ذلك الهدوء والسلام الباديان عليها

اذا ما وجدت منك الغدر اذاقتك مرارته فى اليوم مئات المرات

اذا ما قابلت عشقها بقسوه .. وجهت لك كل أسلحتها لتنتقم لكبريائها المجروح

ليس عليك ان تحبها مجاملة .. لكن عليك ان تراعى عشقها اذا عشقتك

ان تشكرها على احساس جميل وهبتك اياه دونما ارداتها ورغبتها

ان تنظر الى عينيها فى رقه وتخبرها كم هى مهمه عندك

لكنك لا تحمل لها هذا القدر من العشق ..

وعليك ان تدرك جيدا

انه اذا عشقتك امرأه فانت محظوظ ..

فكثيرات هن المعجبات من حولك .. لكن العاشقه هى امرأه مختلفه

هى امرأه لا تقابلها كل يوم ولن تجد منها الكثير

هى امرأة مستعده ان تتركك للمعجبات وتتأملك من بعيد

لتراك بينهم سعيد متباهى بنفسك

لكنها لا تتركك أبدا تذهب الى احداهن ..

فتجد نفسك دوما تعود لها فى النهايه .. فهى ملاذك الأخير

المرأة العاشقه هى امرأة قد تنتظرك العمر كله

تنتظرك من اجل نظره مصحوبة بابتسامه تعطيها لها كل عدة شهور مره

تنتظرك حتى دون ان تشعر انت بعشقها

تقف الى جوارك وتساعدك وتعتقد انت ان حظك هو الذى يساعدك

لكنه عشقها الذى يمدك بطاقة لا تدرى انت بمصدرها

لا تعبث بقلب يعشقك

لا تقسو على انثى تقف فى شباكها كل مساء تنظر الى السماء

تدعو لك بكل تضرع والدموع تملأ وجهها

تدعو لك بكل ما تتمناه .. بكل ما يسعدك

تدعو لك فى سرها وهى تبكى .. وتقف امامك وهى تضحك كانها لا تبالى

فهى تخجل من ان ترى وتلمح بداخلها هاله العشق الهائلة

عليك ان تسجد شكرا لله على تلك النعمه

على امراه وهبتك حياتها دون ان تطلبها

امرأه مستعده ان تغير كل حياتها من اجلك لو انت طلبت ذلك

امرأة مستعدة ان تكون ما تريده انت

مستعده ان تعيش فقط من اجلك انت

انها امرأه عشقتك .. امراه تهواك

فلا تعبث معها .. وكن رؤف رقيقا .. كن محبا

فى نهايه العام

2011-12-31T13:42:00.001+01:00

لا تبتسم الدنيا عادة لكل الناس، فهى فى غالب الأوقات ترينا جانبها المظلم فقط حتى اذا ما رأينا جمالها فى يوم استشعرنا مدى بهائها.

وهنا اتذكر قول الشعار: ضاقت فلما استحكمت حلقتها فرجت وكنت اظنها لا تفرج.

اليوم تنتهى فيزيائيا وعمليا سنة "كبيسه" بكل ما تحمله الكلمة من معنى ومن مرادفات. امتلأت بكثير من الأوجاع المعتادة كل عام، بعض الانجازات بعض التفائل والضحك وكثير من الدموع أيضا. عام امتلا بالكثير من الاشخاص، منهم من دخل وخرج الى ومن حياتى بخفه وسرعه لدرجة انى الان لا اصدق انهم تواجدوا يوما فى محيط علاقاتى. واشخاص آخرين دخلوا وحافظوا على وجودهم بقوة.

لا يوجد ما اكتبه عن هذه السنة فهى تتحدث عن نفسها فى حياة كلا منا ..

لكن يبقى فقط انى فى نهايتها متفائله بقدوم العام الجديد ..

ففى البدايات دوما ما اجد سببا للتفاؤل بقدوم اشياء جميلة وتحقق أمنيات كثيرة ..

فعلينا التمنى .. والدعاء .. وعلى الله الاجابة ..

وانا واثقة فى ربى ..

الامل فيك

2011-12-23T20:41:00.001+01:00

يمر الوقت ببطئ عندما انتظرك

انظر الى الساعه كل دقيقة واتعجب لماذا لا يمضى الوقت

امارس رياضتى المفضلة من المشى

واستمع الى كثير من الاغانى التى اهديتنى اياها فى يوم من الايام

وامضى الوقت بتذكر كلماتك

تذكر بعض التفاصيل الصغيرة التى عشتها معك

ومع كل ذلك يمر الوقت بطئ

كانه يريد ان يعلمنى الصبر

ان يخبرنى ان اجمل الاشياء فى حياتنا لا تاتى الا بالصبر

فاصبر مرغمه فليس بيدى ما افعله سوى ان ارقب الساعه

وادعو الله فى سري ان يمر الوقت سريعا

وان تاتى تلك اللحظة الجميلة التى تقع فيها عينى عليك

تستمر الساعه فى عنادها وتحديها .. لا تتحرك

ويستمر قلبى فى الخفقان بقوة فى انتظارك

لا يصبره الا الامل فى رؤياك غدا .. او ربما بعد غد

المهم هو الامل فى وجودك

الامل فيك

فالصمت فى حرم الجمال .. جمال

2011-12-20T23:39:00.001+01:00

فى بعض الاحيان يكون الصمت لغة اعظم من مئات الكلمات بمئات اللغات

واحيانا اخرى تكون الدمعه اعظم تعبير عن مشاعر لا تصفها مجلدات من المعجم الوجيز

وكما قال الشاعر الصمت فى حرم الجمال جمال ..

فالصمت فى حضرة المحبوب ..

الانصات الى جمال سكوته ..

عظمة صمته

ورقة انفاسه

انها احدى متع الحياة التى لا يشعر بها كل انسان

فقليل هم من يتذوقون الجمال فى الاشياء البسيطة التى تمر على كل الناس

لكن الجمال الحقيقي يكون فى بعض الكلمات الصغيرة الغير مقصودة

تلك الكلمات التى تخرج بين سطور الكلام

لتقول قصص ورويات لا يقولها الحديث الطويل

تبدأ الموسيقى .. وتشتغل الأنغام

فتدور الأماكن من مكانها وتتبدل الأحول الى غير حال

فنجد اشخاص نعرفها او كنا نظن اننا نعرفهم وقد اختلفوا

صاروا "ربما" اقرب الينا من ذى قبل

وربما صرنا نعرفهم اكثر قليل من ذى قبل

ضاقت المسافة التى كنا نتركها بيننا وبينهم

وفتحت الابواب والنوافذ بيننا

فصار الطريق اليهم ومنهم اسهل واقصر

وتستمر الموسيقى .. ومع كل دقائق تمر يرتفع صوت الطبول عاليا

انها ليست المعركة ..

لكنها طبول القلب المنهمك فى الرقص .. ودقاته

تعلن عن اشياء غريبة تمر به للمرة الأولى

جنود غير مسلحين باى نوع من اسلحة فتاكة

كل ما يمتلكونه بعض الورود والعطور والألوان ..

انه غزو منظم لتحويل سواد الليل وعتمته

الى نهار مشرق مزدهر ..

انه خليط بين الصمت والدموع

رقى المشاعر التى لا ترتقى الا بالانصات لدقات الطبول والابتعاد عن صخب الحديث

انها الاحاسيس الجميلة والتفاصيل الصغيره التى من الصعب ان نجدها

واذا وجدنها .. من الصعب ان نتركها ترحل

على أمل اللقاء

2011-12-19T16:54:00.001+01:00

استمع لتلك الاغنية بلا ملل ..

لا افهم مغزاها وكلماتها لكنى اشعر بهم

اشعر بهم حبيب دافء حنون

اسمعها فى اليوم مئات المرات وكانها كل ما تبقى لى لكى يربطنى باشياء جميلة

وكانها اخر الاشياء الجميلة فى الحياة

فهناك نوع من الارتياح افتقده فى حياتى لا اجده الا وانا اسمعها

اجد شيء منك بداخلها ..

قليل من رائحتك .. كثير من روحك

شيء صغير لكنه يكسر كثيرا من الملل المسيطر على حياتى

كانها صديق يحادثنى فى وحدتى

وحبيب يمتلكنى بهمسات الحب المفقودة فى حياتى

لا أمل ولا اعرف كم من الوقت يمر وهى تبدا وتنهى امامى

واذ بنفسي بعد ساعه او اكثر انتبه من سباتى واجد الاغنيه مازالت مستمره

فاودعك واودعها .. على امل اللقاء قريبا

شقاوة أطفال 2

2011-10-18T18:11:00.001+02:00

أيام المدرسة .. من زماان قوى كده لما كنت فى اعدادى مثلا كانت فكرة انى ممكن فى يوم من الايام اخلص تعليميى وابطل اروح مدارس تانى .. وما يبقاش عندى اجازة نص سنة واجازة اخر سنة .. وان نظام حياتى اللى انا متعوده عليه بقاله سنين هيتغير الى غير رجعه خلاص .. وانى هكبر فى يوم من الايام وابقى مسئولة عن نفسى بصورة أكبر.

فى الوقت ده كان وقتى ملكى وبتاعى وكنت بعرف اعمل فيه اللى انا عايزاه بطريقة ترضينى، ماكنتش متفوقة بصورة زيادة لكن كنت شاطرة وطول حياتى بجيب فوق التسعين فى الميه فى الشهادات بتاعتى، كان يوم الخميس والجمعه دول بتوع انا وبرفع فيهم شعار لا مذاكرة ولا دراسة .. كانوا يومين مقدسيين للراحة واللعب ومشاهده افلام الكارتون.

كنت لما بقول لنفسي انا عايزه اعمل حاجه كنت بعرف اعمله ولو فى شيء بيمنعنى كان ممكن يكون ماما او بابا لكن عمره ماكان الوقت هو اللى بيمنعنى، كان فيه احساس رهيب انى بمتلك نفسي وبتحكم فيها، لو عايزه اذاكر بذاكر ولو مش عايزه بمزاجى وانا اللى بتحمل نتيجه قراراتى لوحدى

الواحد مننا بيحن لايام زمان اللى ماكنتش عاجباه فى وقتها لما بيعيش ويشوف اللى اصعب منها .. وبيعرف قيمة كل لحظة ويوم عاشه لما بيفكر فيه دلوقتى ويبقى بالنسبة له حلم بيتمنى الوصول ليه بس حلم لشيء فى الماضى وطبيعة الدنيا ان اللى فات ما بيرجعش تانى خلاص، ولو حتى فكرنا نعيش نفسنا فى يوم من ايام زمان ما فيش حاجة بترجع تانى بنفس الطعم بتاع زمان.

باخد كورس انجليزي اليومين دول وفى الكورس بناخد واجب نعمله علشان نطبق على الكلام اللى بنتعلمه، فطبيعه الاسئلة وانا بحلها فكرتنى بايام المدرسة والكتب الخارجيه والتمارين الكتيره اللى كنا بنحلها علشان المعلومات تثبت فى دماغنا فغصب عنى حنيت لايام ما عرفتش قيمتها غير لما سيبتها.

الواحد لما بيفتكر ايام زمان ويحن لها .. المفروض ما يفتكرهاش علشان يتحسر عليها لان مهما عمل اللى فات مش هيرجع لكن بيفتكرها وبيفتكر متعتها علشان يتعلم انه دلوقتى يستمتع بحياتها ويعيشها بكل لحظة فيها علشان ما يجيش عليها بكرة ويندم انه ضيع لحظة من حياته ما استمتعش بيها .. او بمعنى ادق ما عاشهاش صح..

يارب تقدرنى انى فى سنينى اللى جايه اعيش حياتى صح .. اعرف استغل كل يوم فيها على احسن وجه

وما يجيش يوم عليا اندم على لحظة ضيعتها .. من غير ضحك ولعب وحب :)) .. وعبادة

ДЯт Ōƒ ρīç……© ⎝⏠⏝⏠⎠

2011-10-16T13:59:00.001+02:00

عندما تقرر فتاة أنه حان الوقت لكى تقول لحبيبها "بحبك"

فلتعلم جيدا ان حرب مشتعله من الأفكار كانت بداخلها لشهور طويلة

ونتيجتها هى تلك الكلمة

فاذا قالتها لك .. فلتقدرها حق قدرها

♥

دعاء جميل

كلمات كتبتها منذ أيام خلت

ونشرتها إحدى صفحات الفيس بوك

وجدتها امامى اليوم بالصدفه فانتابنى شعور غريب

فأول مرة ارى شخصا ما يستشهد بشيء من كلماتى

وكنت اظن ان كلماتى ما هى الا مهاترات حائرة

وها هو لينك الصورة وتحتها الكلام

http://www.facebook.com/photo.php?fbid=261837353853471&set=a.132295556807652.11781.132290533474821&type=1&ref=nf

شقاوة أطفال 1

2011-10-16T10:47:00.001+02:00

زمان وانا صغيرة كان عندى عروسة بحبها قوى وما بعرفش انام ولا اخرج ولا اروح اى مكان من غيرها .. كرمبه العروسة المشهوره .. كنت بعتبرها كانها بنتى وصاحبتى .. بنتى لانى لازم أأكلها والبسها وانيمها واخد بالى منها علشان ما ينقصهاش اى حاجه .. وصاحبتى لانى كنت بحكلها حاجات كتير قوى .. وانا مضايقة كنت بحكى معاها وانا مبسوطة كمان بحكى معاها.

ولما كبرت شوية بقى عندى شوية عرايس ودباديب تانيين بس فضلت كرمبه وكانها البكرية بين اولادى .. فهى اغلى واحده على قلبى واكتر واحده بحبها وبهتم بيها .. كنت بحاول اعاملهم كلهم معامله كويسه بس من جوايا ما فيش غير كرمبتى وبس .. كنت بقعد العرايس بتاعتى كلهم وفى وسطهم الملكة "كرمبة" فى العربية بتاعتى وانا بيبي ..وطول الوقت وطول ما انا موجودة فى البيت ماكنتش بتحرك فى مكان من غيرهم .. لو لقيت العربية واقفه على باب الحمام تعرف انى انا اللى جوا . ولو كانت راكنه على باب المطبخ يبقى اكيد دعاء بتعمل حاجه جوا المطبخ .. وقبل ما انام كنت بشيل كرمبتى من وسطهم علشان تنام فى حضنى .. ما كانش ينفع انام ولا يغمضلى جفن من غيرها.

وفى مرة من ذوات المرات نسيتها عند جدتى "عمه ماما" واضايقت جدا وماكنتش بعرف انام الا بالعافيه وكنت كل يوم الصبح امسك التليفون واقعد ارغى مع عمه ماما علشان اطمن على عروستى .. يا ترى هى نايمه ولا صاحيه .. بتاكلها ولا سايباها جعانه .. بتعيط ولا بتلعب وبتضحك .. وكانها بنتى تمام مع انى عمرى ساعتها ماكانش عدى الخمس سنوات.

كانت ايام طفولتى جميلة وكنت بحبها .. كنت طفله شقية جدا جدا .. بتحرك كتير وبحب اطلع عين ماما وبابا واخويا معايا .. وكانوا بيسمونى "سفاحه العرايس" لان ما كانش بيعشلى عروسة اكتر من ساعتين .. كنت بحب قوى اكتشف ما وراء الاشياء .. فكنت بفك العروسة اللى تجيلى مليون حته علشان اشوفها متكونه ومتركبة ازاى وطبعا ما كنتش بعرف ارجع اى حاجه لمكانها تانى وكرمبتى هى اول عروسة تعمر معايا ولسه ليها بقايه عايشه معايا لحد دلوقتى.

بمناسبة عيد ميلادى اللى قرب قررت افتكر شوية من مواقف طفولتى واحكى عنها .. وان شاء الله كل يوم ذكرى جديده لحد ما العشر ايام اللى باقيه دى تعدى على خير :))

وكل سنة وانا طيبة بقى

حاجات مالهاش تفسير

2011-10-07T14:44:00.000+02:00

حاجات كتير بنعملها مالهاش اى تفسير

مش بس اللى بيشوفها مش بيعرف يفسرها لكن احنا كمان مش بنعرف نفسرها لنفسنا

بنقول كلام ليه معانى كتيره قوى وبنقنع نفسنا انه مالهوش اى معنى ومش قصدنا من وراه اى حاجة

بنسمع اغانى ليها ذكريات جوانا وبتفكرنا بناس وأماكن عشنا فيها ومعاها وبنقنع نفسنا اننا بنسمعها عادى جدا .. لمجرد انها أغنيه زيها زى أى أغنيه تانية وخلاص ..

بيجلنا لحظات بنحس اننا عايزين نبكى وننفجر فى البكاء ونصرخ بصوت عااااالى .. ونفسنا الدنيا بحالها تسمعنا وتحس بان جوانا نار وبراكين بتولع ونفسنا فى نفس الوقت نبان قدام الناس كلها اننا الشخصية القوية المتماسكة الجامده اللى ما فيش منها اتنين.

بنخاف من بكرة وبنفكر فيه .. وطول الوقت بنقول توكلنا على الله .. بس يا ترى هى وصلت لقلبنا ولا مجرد كلمة بتتردد على لسانا .. مش قادرين نعرف ..

بندعى ربنا يرزقنا الاخلاص فى النية .. وانه يحققلنا أحلامنا البسيطة اللى شايفنها من أقل حقوقنا فى الحياة .. وبنصبر نفسنا على تأخيرها ونقول كله عند ربنا مكتوب بمعاده .. وكل تأخيره وفيها خيره من ربنا لينا.

كلام كتير قوى بنقوله بس اللى متدارى جوانا أكتر بكتير، كلام حتى مش قادرين نواجه بيه نفسنا، وبتصعب علينا نفسنا كتير لدرجة تخلى الدموع تجف وتعاندنا وماترداش تنزل .. ونترجاها تنزل يمكن تبرد نارنا وتريحنا شوية .. وهى تعاندنا وتحلف ماهى نازله .. ولا مريحانا.

ذكريات محفورة فى قلوبنا عايزين نمحيها من التاريخ . وعايشين عليها .. لا قدرين نستحملها ولا قادرين نعيش من غيرها .. وبنقع فى حيرة مالهاش نهايه .. هو احنا عايزين ايه .. ايه اللى بيوجعنا وايه اللى بيريحنا .. هنروح فين وهنقابل مين .. هنعمل ايه وهنعمله ازاى

مهما فكرنا ومهما خططنا فى الآخر ما فيش شيء بيحصل زى ما احنا عايزينه يبقى نفكر ليه .. وكأن فى حد واقف جوا دماغنا بيشوفنا عايزين ايه ويعملنا عكس اللى نفسنا فيه

ونحاول نفسر فى النهايه ايه اللى جوانا ده و نلاقيه فى النهايه "أحاسيس" .. والاحساس مالهوش تفسير .. مشكلته انه لازم يتحس ما ينفعش يتفهم لانه بيتحس بالقلب مش بالعقل .. والعقل ما بيحسش .. العقل بيفكر ويحلل ويفهم بس .. ومشكلة كبيرة لما تعيش وسط ناس لغت الاحاسيس من حياتها .. وقررت انها ما تفهمش غير اللى على مزاجها بس.

حالة حب جديدة .. وقديمة

2011-09-27T21:48:00.001+02:00

مش كل حالة بنعيشها او بنحسها بالضرورة يكون ليها تفسير أو مبررات منطقية واكتر حاله بنعشها وغالبا ما بيكونش ليها اى تفسير هى حالة الحب .. الحب الحقيقي اللى بجد .. الحب اللى فيه بتحب كل حاجة ليها علاقة بشخص معين، والحب اللى يخليك تفكر بجد ازاى تسعد الانسان اللى بتحبه، واللى بيخليك تشعر بسعادة بجد من جواك لما هو يفرح وتحصله حاجات حلوة وكانها حصلتلك انت بالظبط .. وهو الحب اللى بيخليك تدعيله فى كل صلاة ان كل اللى نفسه فيه يحصله واحسن من اللى هو عايزه كمان.

حالة الحب اللى بتخلى وجودك جنبه سعادة ليك ومصدر فخر بتحسه بيه، بتحسه قوى وانت بتتكلم عنه قدام الناس فخور وسعيد انه حبيبك، وفى كلامك عنه لازم تلزق فى اسمه كلمة "حبيبي" وبينك وبين نفسك كل ما تحكى عنه بتقرأ المعوذتين.. خايف عليه من الحسد لانك شايفه احسن واحد فى الدنيا فى كل حاجة، وخايف على حبك ليه من عيون الناس .. لأن أكيد ما فيش حد بيحب حد زى الحاله اللى انت عايش فيها.

او علشان الكلام يبقى دقيق .. زى الحالة اللى انا عايشه فيها .. حالة أجمل قصة حب فى الدنيا .. أخويا محمد

ظروفنا العائلية وفرق السن اللى مش كبير خلنا نقرب من بعض قوى فى طفولتنا .. مالناش غير بعض انا وهو .. وطول الوقت كنا بنقضيه مع بعض نلعب وناكل ونتخانق واطلع فى عنيه واحس بخوفه عليا وحنانه ورجولته

دايما بتكلم عنه وهو مش موجود على انه حبيبي المنتظر اللى بتمنى يكون فيه حاجات كتير قوى منه، وبقول انه مش بس أخويا، انما هو أخويا وأختى وحبيبي وحبيبتى وصاحبى وصاحبتى .. كل حاجه ممكن أكون محتاجاها.

الحاله الجميلة اللى بعيشها مع محمد أخويا بتعلمنى يعني ايه حب، يعنى ايه تضحى بحاجات بتحبها علشان انسان، وازاى تقبل انسان بعيوبه وازاى تتعامل معاه زى ما هو من غير ما تتوقع انه يتغير .. وازاى ان المعامله تكون من القلب فعلا ما يكونش وراها اى نوع من المصالح او الرغبات.

حالة من الحب اللى بيدى طاقة على الحياة وبيخليك تحب حاجات جديدة وتعمل حاجات جديدة وعندك استعداد انك تروح لأخر الدنيا علشان خاطر انسان انت بتحبه "بجد" من جوا جوا قلبك .. انسان شايف كل اللى فات فى عيونه وبتشوف كل اللى جاى فى عيونه برضه .. انسان وجوده فى الحياة بيخليها مختلفه .. وأجمل كتير.

رحلة بين الغروب والظلام

2011-09-16T17:29:00.001+02:00

لم تكن الرحلة بتلك السهولة، لقد عانينا كثيرا فى الطريق لكى نصل الى محطتنا، فالقطار كان كعادته فى هذه الأوقات من السنة، مكتظ بالبشر وكأنه آخر وسيلة انتقال للبشرية لتنقلهم من اماكن القحط والجفاف الى مواطن النبات والمياه، تماما كأفلام الخيال العلمى الأجنبي.

أكوام البشر الواقفه فى كل مكان، والآخرى النائمه على الأرض فى ارتياح بالغ كانها فوق سرير من الأسفنج الطبى وليست على أرض متسخه وأكوام من الأرجل الذاهبه والآتيه التى تدهسهم فى الدقيقة مئات المرات.

يُخيل لك للحظات انه كان قطار متهالك من ذوى التذاكر الزهيده، لكن الحقيقة انه من المفترض ان يكون احد تلك القطارات الفارهه الغالية الثمن، لكن ما عاد هناك فارق، ففى أوقات الأعياد يصبح عند بعض الناس استعداد لو يبيعوا منازلهم من أجل ثمن تذكره اى شيء يوصلهم الى غاياتهم من قضاء تلك الأوقات بين أهلهم على أمل الشعور ببعض الدفيء والطمأنينه التى نحرم منها نحن ساكنى المدن الكبيرة.

توقف القطار كثيرا فى رحلته، توقف كثيرا لكى يحمل المزيد من الأشخاص من مختلف المدن والمحافظات لينقلهم الى مدن ومحافظات آخرى .. تخيلت للحظات ان هذا القطار يسمح للناس بركوبه حتى لو لو امتلاء عن آخره، لكنه لا يسمح لأحد بمغادرته .. مهما فعل.

نظرت من الشباك بجوارى أريد ان ارى بعض البراح .. بعضا من اللون الأخضر تصحبه زرقة السماء الباهته المائلة للون البرتقالى وقت الغروب، أحاول أن أجذب انتباهى لأى شيء بعيد عن كل ما حولى من أشياء.

فلم أجد ما يستحق الاهتمام فى حياتى، فابتسمت ابتسامه ساخره من نفسي، واتجهت لأنظر الى وجوه الناس من حولى، كل انسان يحمل فى أعلى جسمه شيء شبه مستدير نطلق عليه نحن معشر البشر .. رأس .. وبداخل كل رأس يوجد شيء اسمه عقل .. او مخ .. لا ادرى ما الفارق بينهما لكن فى النهايه يوجد بداخل هذا الشيء عدد لا حصر له من الأفكار والأمنيات والإشارات التى تنتقل منه الى باقى أعضاء جسده لينتج عنها تصرفاته المختلفه.

فأنظر الى رجل نائم مسند رأسه على حائط من حوائط القطار وفمه مفتوح على مصراعيه، مفتوح لدرجه ان يمكنك ان تدخل يدك كامله بداخله وتخرجها دون ان يشعر هو بشيء، أنظر اليه وأتأمل، يبدو عليه الإرهاق، ويبدو كأنه يهرب من اشياء تركها خلف فى العاصمه ويحاول ان ينسي أشياء ذاهب لملاقاتها بين أهله، واختار النوم وسيلة ليهرب فيها من كل الأشياء، وسيلة ليكون فيها مع نفسه وملك نفسه لساعات قليلة.

وهذا الرجل الذى يحمل عينان فى رأسه، لكنهم ليس ملكا له، انما ملكا لكل البنات والسيدات التى تمر أمامه، فهو يترك عيناه لتذهب هنا وهناك لتنظر وتنظر، متمنيه أن تخترق كل الحواجز والعراقيل وان تذهب بنظرها الى ابعد من بعيد، فأنظر اليه بجرائة محاولة ان انبهه الى انى افهم جيدا ما يفعله بتلك العينان، أحاول ان أخبره بعينى انى اود ان أقتلع عيناه منه ولو للحظات ليدرك قيمتها الأكثر أهميه من النظر الى النساء، لكن عينى تقع فجأه على يده فأجد بيده الشمال دبله، او ذلك المسمى بخاتم الزواج، فأترك التفكير به وبعينيه المستفزه للنصف الأخر من خاتم زواجه، بتلك المرأة التى تحمل اسم ذلك الرجل، بشعورها عندما تكون بجواره وهو ينظر الى كل النساء ما عداها، عنده شعور انها ملكا له فلا يبالى بالنظر اليها انما هو ينظر الى هؤلاء اللائى لا يمتلكهن ليشبع عنده شعور بالتملك .. نعم تملك، فهو يمتلك عينان.

وهناك فى نهايه العربه تقف امرأه يبدو عليها الغضب من معشر الرجال جميعا، فهى تحمل بين يدها طفل صغير ساعدها على احضاره للدنيا رجل، ويبدو انه تركها به وحيده فى الحياه، فهى كانت ترتدى الأسود ويعتليها الحزن المغمس بالغضب، فكل من حولها رجال، يجلس هنا وهناك رجال، وهى تحمل ذلك الطفل الرضيع بين يدها ولم يحاول أحدهم ان يترك لها مقعده دقائق لترتاح من عناء حمل الطفل، ومن عناء السفر، ومن عناء وجودها فى مجتمع ممتلاْ بالرجال الذين لا يتذكرون النساء الا عندما يجوعون او يرغبون.

كانت الرحلة طويلة بأفكار الناس من حولى، وها هى الشمس قد غربت واصبح السواد يحيطنا من كل جانب، سواد السماء التى اختفت شمسها، وسواد النفوس التى ملأها الهم .. وخوف من طريق مجهول ندرك بعض من بدايته ولا ندرى شيء عن نهايته .. طريق نحاول فيه ان نجد رفقاء وأصدقاء نمضى معهم الوقت فيمضى سريعا، ونحاول أن نجد فيه قلوب جميلة لم يصل اليها السواد لتحملنا معها على السكينة والهدوء .. لكى نصل وجهتنا فى نهايه الرحلة بأقل الخسائر الممكنه، ولندرك ان الرحلة ليست فقط فى نهايتها وانما أهم ما فيها هى سكتها.

كان نفسي أكون

2011-09-15T01:25:00.002+02:00

كان نفسي أكون جميلة .. اول ما تشوفنى عنيك تتشدلى ما تقدرش تشيلهم من عليا

وكان نفسي أكون أعقل من كده .. تحس انك محتاج تتكلم معايا وما بتشبعش منى

كان نفسي أكون أهدى من كده .. تحس معايا بالهدوء اللى عشت تحلم بيه

كان نفسي اكون الشخص اللى فى خيالك ..

اكون حلمك اللى اتفصل فيا ..

وكل اللى بتحلم فيه اكونه انا وزيادة

كان نفسي أكون حبيبتك اللى عاشت فى خيالك واول ما شفتنى افتكرتها واترميت فى حضنها

كان نفسي اكون انا البنت اللى بتتمناها ..

لكن انا مش اى حاجة من دول ..

انا ببساطة انا ...

بحب حاجات انت ما بتحبهاش .. وبقول كلام ما بيعجبكش

بلبس حاجات مش على مزاجك .. وبتجنن فى اوقات مش مناسبة بالنسبالك

كان نفسي اكون حلمك .. لكنى واقع .. مش حلم

انا بغلط .. بتعصب .. بتخانق .. ودمعتى قريب وسهل تنزل

مش جميله زى كل البنات اللى حواليك

مش عاقله زى اللى عرفتهم قبلى

ومش هادية زى حلمك الهادى الجميل

كان نفسي اكون حلمك .. علشان اكون سبب فى سعادتك

كان نفسي اكون نسمه الهوا اللى بتعدى على وشك فى عز الحر فتنعشك

او كوباية المايه الساقعه اللى بتجيلك وانت عطشان ومستنيها من زمان

او لحافك اللى بيدفيك من برد الشتا

او كتابك اللى بتجرى تقرأ منه وانت زهقان

كان نفسي اكون كل حاجه محتاجها

لكن انا مش حاجة من دول .. انا الميزة الوحيدة اللى عندى .. هى انى بحبك اكتر من اى واحده عرفتها فى حياتك .. واكتر من كل اللى انت اتخيلته واتمنيته يوم فى حياتك

شعور جميل

2011-09-11T15:43:00.000+02:00

الاحساس نعمه جميلة من ربنا

احساسنا باللى حوالينا .. بمشاكلهم وآلامهم قبل أفراحهم وسعادتهم

بيقولوا انه صعب الواحد يحس بنفس الاحساس "المؤلم" او حتى المبهج اللى بيحس بيه شخص تانى الا لو بجد وقع فى نفس الموقف اللى بيمر بيه الانسان ده.

علشان كده بيسموها مشاركة وجدانية .. يعني ان الواحد بيبدى شعور يتناسب وحالة الشخص اللى اصلا بيمر بالحاله دى .. حلوة او وحشه بقى ..

يعني لما واحد بيروح يعزي فى شخص ما .. يمكن يكون اصلا ما يعرفش مين مات ولا حتى هو يقرب للشخص اللى هيعزيه ايه لكنه لما بيروح العزا بيشارك الشخص اللى بيعزيه فى مشاعره واحساسه بكلمات حزينه .. ولبس حزين .. وتعبيرات وجه حزينه .. يعني بيشاركه بكل الوسائل الخارجيه اللى توصله معنى انه حزين زيه .. لان غالبا لما الشخص بيكون حزين بيبقى غصب عنه نفسه كل الناس تبقى زيه.

هو احساس بنعيش نفسنا فيه حتى لو مش احساس حقيقي ومش واصل لقلبنا بجد بس الجميل فعلا لما تكون كل تصرفاتك دى طالعه من قلبك بجد .. عن احساس حقيقى ..

يعني فى نفس الموقف بتاع العزا .. حتى وانت ما تعرفش مين اللى مات .. لكن انت بتحب حد كان بيحب الشخص اللى اتوفى .. من شدة حبك للانسان ده قلبك بيحس بآلمه .. بيحس كأن الحزن ده حزنه هو بجد

لما روحك تقرب من روح انسان .. وتبقى جنبه صافيه قوى وشفافة، .. لدرجة ان الآه قبل ما تشكه بتوصلك وبتتألم بيها زيه بالظبط .. وأكتر شوية، فانت بتتألم للمشكلة نفسها وانها حصلت اصلا ، وبتتألم أن شخص غالى عليك حصلتله مشكلة وبيتألم "ايا كان نوع الألم ده" وممكن يزيد ألمك شوية زيادة كمان لو انت عاجز عن انك تتصرف وتحلها.

لما تحس بالعجز قدامه وانك مش قادر تخفف عنه، مش عارف غير انك تبكى بعيد عن عينه وتحاول قدامه تبتسم وتبينله ان الدنيا جميلة وان مشكلته مهما كانت صغيره وهتتحل ببساطة، ومن جواك بتتقطع عليه لأنك حاسس بيه .. لأن قلبك حاسس بقلبه وعارف هو عايش فى ايه دلوقتى .. ولأنك حتى وهو بعيد عنك ومافيش بينكم كلامه بتحس بكل حاجه بتحصله، بتحس بتعبه او بفرحه

ولوقدرت انك تخلى ابتسامة صغيره تترسم على وشه حتى لو انت مش شايفه قدامك .. لو قدرت تخليه لثوانى بس ينسي ايه مشكلته وتشغله بشيء تانى حتى لو تافه بس على سبيل انك تبعده عن الشيء اللى بيضايقه .. ده شيء بيخليك تحس انك عملت انجاز عظيم وبيفرح قلبك لثوانى ..وتكمل الفرحه لما مشكلته تخلص على خير ولما تلاقى القلب اللى بتحبه رجع يغنى للحياة من تانى.

جميل ان يكون فى حياة البنى آدم مننا ناس تنطبق عليهم المواصفات دى، ناس نحس بيهم رغم المسافات .. وناس بتحس بينا مهما دارينا عليهم

حالة من الخوف ..

2011-09-10T17:29:00.001+02:00

فى شيء من الخوف بيحاوطنا .. خوف من المجهول والمستقبل .. خوف من تجارب جديدة ومن ناس جديدة .. خوف من احساس جديد

وكأن الدنيا دايره مقفوله علينا عايشين حياتنا فيها خايفين الدايره تتكسر ونخرج منها واحنا طول الوقت اللى عشناه ما شفناش اشكال تانية غير الدايره .. وما نعرفش لو خرجنها منها وقابلنا اشكال تانية هتبقى أجمل ولا هتبقى بتخوف ؟؟

بنحلم بحاجات ونعيش طول الوقت مستنينها وأول ما نقابلها بنخاف منها، بنخاف يمكن ان الحقيقة ما تبقاش بحلاوة الحلم، ويمكن اتعودنا على الأحلام وخايفين نخرج من دايرة الأحلام لأشكال الواقع المختلفه .. وان فى الآخر كل الأشكال دى ما ترضيناش وما تطلعش زى ما عشنا عمرنا كله مستنينها

الخوف حقيقة موجودة وبتتملك جزء كبير من حياتنا، مش بس خوف من بكرة لكن كمان خوف من امبارح وأن شيء صغير حصل وما اخدناش بالنا منه يأثر على احلامنا وعلى بكره اللى لسه ماجاش

ومع الوقت بيتحول لمرض عايش جوانا، بيخلينا نبقى خايفين من الخوف نفسه، ومتوقعين مع كل خطوة بنمشيها اننا هنقابل الخوف .. وكانه شخص واقف لنا بالمرصاد ومستحلف ليوقف فى طريقنا ويحرمنا اننا نستمتع بحياتنا فى هدوء .. بنثق فى نفسنا وفى قدراتنا وفى قلبنا وطهارته .. لكن الدنيا مش بتدينا فرصه نعيش أحلامنا ببرائة زى ما حلمناها، دايما بيقف قدمنا حاجز الخوف ... واهو خوف من اى حاجه بقى

خوف من الآلم .. من الفشل .. من الحياة .. من كل شيء حوالينا

وأهم منهم .. خوف من الحب .. وخوف مرعب على قلوبنا من كل حاجه

بتحب نفسك ؟؟

2011-09-10T02:26:00.001+02:00

مش غرور انك تحب نفسك وتقدرها صح .. وتخليها مهمه عندك وأهم من اى حاجه تانية .. الحقيقة هى انك لو ما اهتمتش بنفسك وحبتها وصدقتها وصدقت انها تستحق احسن حاجه فى الدنيا بحالها .. ماحدش تانى هيقدرك ولا هيصدقك ..

لان كل تصرفات الناس معاك بتكون فى النهايه هى انعكاس لتصرفك .. واهم تصرف بتعمله فى حياتك هو التصرف اللى بتعمله فى حق نفسك.

علشان كده لما بيجيلى لحظات احباط او اكتئاب .. اول حاجه بعملها علشان اخرج من الحاله دى هى انى افكر فى نفسي من اول وجديد وكانى بعيد اكتشاف نفسي ..

بفكر فى الحاجات الكويسه والمميزات اللى فيا واللى اكيد فيه منها حاجات مش موجوده عن حد تانى غيرى .. مميزات ربنا ادهالى انا لوحدى علشان يميزنى بيها بين كل الخلق.

ولما بفكر فى نفسي وبطلع المميزات دى اللى كانت فى وقت من الأوقات مختفيه عن بالى .. بحس ان فعلا ربنا مدينيى حاجات حلوه قوى، وفى مقابلها انى ما استحقش غير كل حاجه حلوة برضه .. بحس انى بظلم نفسي لما برضى بحاجات نص نص كده ..

ربنا لما بيخلق جوانا شيء جميل .. لازم ما نرضاش ليه غير بكل شيء جميل .. علشان يزيده جمال فوق جماله وأعتقد ده بيكون نوع من شكر ربنا على نعمه اللى ادهلنا ..

اللحظات اللى الواحد فينا بيحاول يفكر فيها فى مميزاته .. بتكون لحظات قوة .. وبترجع للواحد ثقته بنفسه وبقدراته على انه يعدى كل المشاكل وكل عقبات الحياة .. وبتزود من درجة حبه لنفسه ورضاه عنها .. واللحظات دى برضه هى اللى بتفرق فى معامله الناس للواحد .. على قد ثقته بنفسه وعلى قد حبه لنفسه على قد ما الناس بتثق فى قدراته وبتحبه برضه

خليك واثق انك انسان رائع وما فيش منك اتنين

ربنا اداك مميزات وقدرات مش موجوده عند حد غيرك

وانك تستحق اجمل شيء موجود ومخلوق بس علشانك

وانك على قد ما بتحب نفسك

وعلى قد ما بتحب الناس اللى حواليك

على قد ما الدنيا بحالها هتحبك

هشيلك من حياتى ؟؟

2011-09-02T23:39:00.000+02:00

ما كنتش أعرف ان الحب بيتعب قوى كده .. كنت فكره انه بس شيء جميل وانه السبب فى كل حاجة حلوة فى حياتى، لكن ما فيش شيء حلو بيستمر على طول .. والحب "اجمل شيء فى الدنيا" بقى هو سبب دموعى وأهاتى اللى كنت نسيت طعمها معاك، ومعاك برضه رجعت اعيش فيها واتعذب وانكوى من جوايا بيها ..

صوتك اللى كان بيضحكنى ويرجعنى طفله صغيره فرحانه وهاديه ومطمنه هو نفسه اللى خلانى أسكت النهارده وملاقيش كلام أقوله .. هو نفسه اللى كان بيضحكنى ويفرحنى فى يوم بقى هو السبب فى دموعى النهارده .. هو اللى خلانى ابص لنفسي لأول مره واحس انها صغيره قوى .. وهبله قوى ..

اول مره أحس قد ايه انا بحبك وانت ولا فى بالك .. طول الوقت كنت بقول وماله .. ايه المشكلة .. مش مهم هو يحبنى المهم انى انا بحبه .. انا مبسوطه كده .. ومش عايزه منه اكتر من انه يكون موجود فى حياتى وخلاص .. بس اكتشفت انى انا مش موجوده فى خريطه حياتك فى اى مكان .. ولا حتى على الرف .. انا مش موجوده فى حياتك وكانى اصلا كائن مش موجود.

اول مره ابكى هتجنن علشان أسمع صوتك وقلبى بياكلنى عليك وايدي مش مطوعانى امسك التليفون وأكلمك .. حاسه انك ما بقتش ملكى ومش من حقى أكلمك .. مش من حقى أحس بيك .. ولا حتى أفكر فيك ..

بس قولى ازاى اللى حلمت بيه انساه فى ثوانى .. واحساسى اللى جوايا ليك امسحه من حياتى كانه ولا حاجه .. ومين هيمسح دموعى اللى على خدى دى؟؟ .. مين هيقدر يشغلنى وياخدنى ويسرقنى من نفسي زيك؟؟ .. ومين هشوفه من بعدك فى عنيه فيملاهم غيرك .. ؟؟

قولى ازاى ابطل أحبك .. ولما اشوفك ما اترميش فى حضنك .. وازاى ابطل اسمع صوتك كل يوم فى التليفون .. وازاى اشيلك من أحلامى .. وما أفكرش فيك كل ثانيه ..

التقينا اليوم

2011-09-02T06:07:00.000+02:00

تبتسم وتبتسم .. بل ربما ترقص حتى وهى فى قمه الإرهاق، فكل شيء يهون بعد ان رأته، بعد ان لمست يده أخيرا

لم يكونا على موعد، فهما دوما ما يتلقيان بلا ميعاد ودوما ما تسعى هى الى لقائه ومحادثته، وبرغم عدم اهتمامه او محاولته الوصول اليها الا انها لا تبالى، لا تفكر، فهى لا تهتم بمن يتقرب الى من!! المهم عندها ان تحيا بجواره لحظات حتى لو أُجبرت على الوقوف من بعيد والنظر اليه، فتكون فى قمه سعادتها عندما تراه يتحدث ويبتسم .. فهو يبدو بخير .. وتتألم عندما تراه مريض او متعب .. او يمسسه مكروه .. بل يقتلها رؤيته يتألم او يقول آآه .. حتى لو كانت تلك الآه التقليدية التى تخرج مننا فى اليوم مئات المرات.

واليوم حين رأته كانت كعادتها فى شوق الى لقياه، تحادث نفسها وصديقاتها بانها لا تحبه وبانه صديق كغيره من الأصدقاء لكن فى أعماقها تدرك انه ليس كغيره من الأصدقاء، فقلبها لا يهفو ويرفرف مع غيره كما يفعل معه، ويدها لم يشتعل بداخلها الحنين الا عندما لمست يده الدافئه فى سلامه السريع رغم انها ومنذ سنوات تمتد وتسلم على كثيرين غيره، لكن فى يده يوجد اكسير لا يوجد عند غيره من الرجال.

تذهب الى كتاب مذكراتها لتسجل اليوم فى التاريخ، انه ليس اول يوم تلقاه، ولن يكون الأخير، وليس يوم اعتراف بحب احدهما للآخر، ولا اى علامه مميزه اخرى من تلك العلامات المشهوره .. لكنه يوم احتضنت يدها يداه لجزء من الثانيه وهى فى أشد لحظات الشوق اليه، وانما ليست يدها فقط المشتاقه بل انها كلها بكل كيانها له مشتاقه.

تكتب فى مذكراتها، انه اليوم .. ولا يهم التاريخ فهو فى قلبى محفور .. لكنه كان اليوم .. رأيته وحادثته واقتربت منه .. امسكت يدي يده ،، واحتضنتنى عيناه .. وفتحت له قلبى .. وازداد حبه بداخلى فوق ما انا فيه بكثير

ان اليوم .. ادركت ان وجوده مهم .. وان قولى انه شخص غير مهم هراء .. وادركت ان عيناه جميله . وان النظر فيهما نعمه من الله ..

الدنيا بتلف

2011-09-02T04:52:00.000+02:00

الدنيا بتدور وبتلف ..
ما بتقفش
المهم انت هتحط رجلك فين
هتمشى خطوتك لفين ..
عايز ايه .. ومقرر ايه ..
وقت ما تقرر وتبدا .. ما فيش قوة فى الأرض هتمنعك
الأهم من إرداة الدنيا .. إرادتك انت
الأهم هو حلمك .. وهتحافظ عليه إزاى :)

انا ما بحبش حد

2011-08-31T22:36:00.003+02:00

هتصدق لو قلتلك انى ما بحبش حد .. او بمعنى اكثر دقه ووضوح انا ما فيش فى حياتى علاقة حب عاطفيه .. ولا من طرف واحد ولا من طرفين ولا من طرف تالت حتى .. ومع ذلك انا على طول عايشة فى حاله حب وبحلم بالحب وكانى عايشه فيه .. بكتب عنه وكانى عايشه فى حاله حب عنيفه.. لو لاحظت يعني نص كتاباتى تقريبا عن الحب .. وبكتبها وكانى بحب شخص معين وبوجهله رساله ما .. ومواقف كتير بعيشها على الورق لكن الحقيقة انه ما فيش حد فى حياتى ..

فيه اللى بيتهمنى انى قافله على قلبى ومش سايبه يتنفس وفيه اللى بيتهمنى انى ما بعرفش أحب اصلا .. والحقيقة هى انى يمكن اكون بجد خايفه عليه .. انا جربت فى يوم افتح لقلبى الباب واسيبه يخرج ويشوف ويجرب ... بس اكتشفت ان التجارب لما تبقى ليها علاقة بالقلب ما تنفعش خالص .. القلب واحد وما نستغناش عنه

فقررت انى اقفل عليه بميت قفل وميت مفتاح .. وما اسمحش لاى حد يقرب منهم الا لما يمر بمليون امتحان وامتحان .. لكن ومع كل ده برضه بحب الحب وبعيش نفسي فيه وبستمتع بكل احاسيسه .. بطلعها فى الكتابه .. فى الأغانى .. فى انى اسرح شوية بخيالى لبعيد .. وانى فى النهايه ادعى ربنا من قلبى انى اعيشه زى ما بحلم بيه .. بس اعيشه صح .. فى النور وفى حلال ربنا

ومش معنى كده ان ما فيش حد فى الدنيا يستاهل .. بس معنى كده انى انا اللى ما قابلتش الحد ده لان أكيد فيه انسان يستاهلنى واستاهله بس ربنا مآخر لقانا لحكمه ما يعرفهاش غيره .. الانسان اللى يستاهل افتحله الباب والشباك والبلوكنات وادخله حياتى وقلبى وعقلى ويمتلك مستقبلى وتاريخى .. واشيل اسمه وابقى جزء منه ويكون جزء منى ويكون اولادى نور عنيا جزء مشترك بينى وبينه .. لسه ما قابلتهوش ومعاد وصوله ما يعلمهوش الا ربنا، قريب ولا بعيد، الله أعلم.

انا عارفه ان شروطى صعبه .. واللى هيعدى من امتحان هيبقى خايف من اللى بعده .. بس هو انا عندى ايه غير قلب واحد .. عايزه اديه لانسان واحد هعيش معاه حياتى الواحده .. واحافظ عليه فى غيبته وحضوره علشان يكون شريكي فى جنه ربنا باذن ربنا.

ولحد ما يجي البطل الخيالى .. اللى هيكسر كل الحواجز اللى بنيتها فى حياتى .. ولحد ما يقدر يسرقنى من نفسي ويسرق قلبى ويحببه فيه .. انا ما بحبش حد .. العالم كله عندى عزيز .. لكن مش أكتر من معزه الأخوات .. الأصحاب .. الأصدقاء.. اى مسمى بقى .. لكن قلبى مش ملك لحد ..

لأنك معايا

2011-08-31T15:11:00.000+02:00

لأنك معايا حياتى بقى لها شكل جديد

اتلونت بألوان جميلة

وبقيت بتضحك وترقص وتغنى

لأنك معايا كل حاجه بقت حلوه فى عنيا

وبقيت بحب كل الناس

وبقيت بصبر على حاجات ماكنتش بصبر عليها زمان

لأنك معايا بقيت ملكة السعادة

اتغيرت فيا حاجات كتير

حتى ضحكتى بقت أنقى وأصفى

بقت من القلب مش تمثيل

لأنك معايا

بقيت بحلم .. وعندى أمل

متأكده ان أجمل يوم فى عمرى لسه ما عتشهوش

وبتمنى اعيشه معاك

وأعيش كل اللى باقى من عمرى معاك

لأنك معايا .. بقى كل شيء بتقوله مطاع

انت تحلم وانا انفذ

انت انت وما فيش حد غيرك

ولا قبلك .. ولا بعدك .. ولا غيرك

لأنك معايا اتعلمت يعني إيه "حب" ويعني ايه حنان

اتعلمت يعني ايه شوق ولهفه

يعني القلب يضحك والعين تضحك

معاك اتعلمت ازاى اعيش وازاى استمتع بالحياة

لأنك معايا الورد بقى بيضحك

والسماء بقت صافيه

والناس بقت فرحانه .. وماشيين مبسوطين

والمشاكل كلها انتهت من العالم

بس لأنك معايا

لأنك معايا ..

كل حاجه حلوة كنت بحلم بيها

بقت موجودة وقريبة

وكل حاجه كنت خايفه منها

بعدت عنى واختفت

لأنك معايا .. انا مش محتاجه حد تانى من البشر

مش محتاجه غير لحظة صغيره تجمعنا سوى

تضمنى فيها

تمسح على شعرى

تقولى فيها بصوتك وبقلبك .. بحبك

كليب عملته فى السريع كده .. لأغنيه لأنك معايا

لسامو زين

بمووووووووووووت فيها

والفيلم ده

You've got mail

فيلم مالوش حل ..

وأسم الأغنيه هو اللى أوحالى بالموضوع ده على فكره

:))

وأنا مستنيه الزفه

2011-08-31T02:17:00.002+02:00

كنت قاعده فى وسط أصحابى, هما بيضحكوا ويغنوا ومبسوطين وانا وسطهم مش حاسه باى حاجه حوليا, سرحانه وقلبى بيدق, كنت مركزه على باب الاوضه, مركزه ومترقبه للحظه اللى الباب هيتفتح فيها, كنت مستنياه يدخل عليا, كنت مستعجله اوى, وخايفه اوى, بس برغم خوفى وقلقى كنت عاوزاه يجى, "ياريت يجى بسرعه بدل القلق اللى انا فيه ده".

فجأة الباب اتفتح بهدوء شديد, بوقار شديد" شفتوا انتوا باب يتفتح بوقار" ولقيت بابا داخل عليا, بيحاول يبتسم, هو فعلا بيبتسم وباين عليه الفرحه وفى نفس الوقت شايفه دموعه جوه عنيه ماسكها بالعافيه.

اول ما بابا دخل " هو اللى انا كنت مستنياه على فكره" كل اصحابى اللى حواليه سكتوا فجأه, للحظات مر سكون غريب وفجأة "فجأة برضه" أدركت واحده صاحبتى انها لازم تزغرط, ده الشئ الطبيعى فى المواقف اللى زى دى يعنى, هى بدأت والباقين ما صدقوا بقى :$انا ما قدرتش اقوم أقف, فضلت قاعده لحد لما بابا قرب منى ووطى وباس راسى ومسك ايدى وقالى مش يالا بقى, انا اطمنت اوى لما بابا مسك ايدى وهديت اوى لما سمعت صوته فى ودانى, بابا بقى.

بصيتله, كنت مكسوفه اوى وفرحانه اوى ومتلخبطه اوى, بس اعمل ايه لازم اقوم ولازم امشى, "انكجت" بابا فى دراعه اليمين وخرجنا من الاوضه بعد ما أصحابى سبقونا.خرجنا ومشينا فى طرقه طويله ما بين أوض الفندق, وفجأة "فجأة تانى" مسكت بابا جامد ووقفت, كنا خلاص على بدايه فتحه السلم, يعنى اول ما نلف الناس كلها هتشوفنا, قلتله بابا عاوزه أقلك أنى بحبك اوى ربنا يخليك ليا وشكرا اوى بجد على كل حاجه عملتهالى فى حياتى, شكرا على كل حاجه بتحبها سبتها علشان تجبلى انا حاجه بحبها, انا بحبك اوى وهتوحشنى اوى وكنت خلاص هعيط, بس بابا ضحك وقالى يالا يا عروسه بدل ما نروح تانى إذا كنت هوحشك كده.

بصيت فى الأرض, كسفنى بصراحه بالكلمتين دول, هو أنا بحبه صحيح, ماهو بابا برضه,بس انا يعنى مستنيه اليوم ده من زمان, بصراحه ماعنديش نيه اروح بيت أهلى ده تانى من غير حبيبى "جوزى", رحنا مكملين مشى وانا ساكته, السكوت أسلم برضه.

وأول ما وصلنا لبدايه السلم, قمته يعنى, الموسيقى اشتغلت, والناس بدأت تزغرط وتصقف وتغنى ,شفت صاحبتى ماسكه كاميرا بتصور اللحظات دى, زى ما انا قلتلها علشان ابقى انزلها على الفيس بوك وافرجها لاصحابى اللى ما قدروش يحضروا فرحى, وابن خالتى لمحته من بعيد بيتكلم فى الموبايل, هو على طول ماسك الموبايل وبيتكلم كده!, وشفت طنط صاحبت ماما, مش عارفه اسمها ايه, بس فاكره انى سلمت عليها مره قبل كده وقالتلى ماشاء الله كبرتى و بقيتى عروسه حلوه يا دعاء, ادينى بقيت عروسه بجد يا طنط اهو!.وشفت ماما وهى بصالى, شكلها مش مصدق انى انا بنتها, مستغربانى مش عارفه ليه, يمكن من الفرحه, فرحانه ان بنتها كبرت وبقت عروسة بقى.

بصيت على كل الناس من كتر لخبطتى, بصيت فى كل حته وكنت مكسوفه اوى ابص على آخر السلم, ما انتوا عارفين بقى مين فى آخره :$بس فى الاخر عينى جت فى عينه, وما قدرتش انزلها من عليه تانى, بدأت انزل السلم وايدى فى ايد بابا وعينى فى عين حبيبى, والفرقه مستنيه تحت السلم وبيعزفوا, نازله السلالم يا مشالله عليهاعروستنا الحلوة وبابا فى ايديها.

ايه ده السلم خلص ولقيت بابا بيسيب ايدى, وانا ماسكه فيه جامد اوى, ومش عاوزه اسيبه, انت رايح فين بس يا بابا ؟؟!

لقيت بابا بيميل على حبيبى وبيقولوا شيلها فى عنيك, دى نور عنيا, وراح بايسنى تانى فى راسى, بس كانت طويله شوية المرة دى, تقريبا حس انى خرجت من البيت خلاص, ومهما رجعته مش هرجع دعاء اللى بضفاير زى زمان.

وبعدين لقيت ايدى "مأنكجه" حبيبى , ماهو بقى جوزى بقى, ولقيت الزغاريط بتزيد والطبل بيزيد, وانا قلبى بيدق, ايه ده كل الناس بتبص عليا, "يا كثوفى يا كثوفى" , بس حبيبى ميل عليا وقالى, ما تخافيش أنا معاكى, وبحبك.

عارفين, انا لسه ما كملتش 20 سنه ولا اتجوزت ولا حاجه, انا بس باتخيل الموقف من وحى الأفلام العربى.

مجلة كلمتنا

عدد 115

أغسطس 2009

دعـــــــــــــاء جميل

خلتنى أفكر فيك

2011-08-30T15:30:00.003+02:00

من يوم ما عرفتك وانا مش ببطل أسئلة وكل أسئلتى مش بلاقى ليها اى اجابات .. ازاى بقيت مهم بالشكل ده فى حياتى، ازاى اتعلمت الصبر على لقاك وعلى بعدك وعلى كل حاجة بتربطنى بيك .. بصبر فى بعدك على بعدك .. وبصبر لحد ما يجي معاد لقاك .. لما بكلمك واقفل معاك بحتاج صبر جبال يصبرنى على شوية الساعات والأيام اللى هستنى فيها المره الجاية اللى هسمع فيها صوتك ..

ازاى بقيت بسامحك مهما عملت ومهما قلت .. مهما بعدت بطلعلك الف عذر ممكن بسببهم تكون اتاخرت او ما جيتش فى معادك .. وقلبى مش قادر يلومك ولا يزعل منك

ازاى تكون انسان واحد بس .. لكن بتسرق تفكيرى وتخلينى مش عارفه أفكر فى اى حد تانى غيرك .. ومهما كلمت الف غيرك وقالولى كلام حلو تتمناه اى واحده مش بفرح غير لما بسمع صوتك حتى لو بتحكيلى اخبار ماتش امبارح ايه !!!

انا زى ما انا .. كل حياتى زى ما هى بكل تفاصيلها الصغيره قبل الكبيره، لكن فيها شيء جميل جديد خلانى استمتع بكل التفاصيل دى واعيش فيها كانها جديده واول مره اعيشها ...

بتعمل فيا ايه؟؟

2011-08-30T02:31:00.000+02:00

سؤال بسأله لنفسي دايما كل ما أقابلك أو اسمع صوتك ..هو انت بتعمل فيا ايه؟؟ تاثيرك اللى بتسيبه عليا ده بتجيبه منين؟؟ ازاى انت كده وانا كده وازاى بيحصل كده ؟؟

عمرى ما كنت بعبر عن مشاعرى ولهفتى لحد بالشكل اللى بيحصل معاك، أول ما أشوفك انسى اى مسافة ما بينا، انسى المكان اللى احنا فيه وما اركزش فى الناس واقول لنفسي بصوت عالى من جواى، طب ياريت الدنيا بحالها تشوفنى معاك .. لما بشوفك قلبى بيتنطط جوايا ..من الفرحه واللهفه بيبقى عايز يرمى نفسه فى حضنك وينام .. واللى يشوف يشوف واللى يتكلم يتكلم ..

مش بعرف ادارى لهفت عينى وفرحتها بانهم اخيرا وبعد اشتياق شافوك .. ده لو فات يوم واحد بس بحسه سنين طويلة .. بتوحشنى بتوحشنى .. مش عارفه أقلك بتوحشنى قد ايه ..

ولما بسمع صوتك .. لما بتقولى يا دودو .. لما بتحكيلى عن حياتك وأهلك وأصحابك .. لما بحس فى لحظة انى خطرت على بالك وانا بعيده عنك .. كل دى حاجات بتخلى قلبى يبقى عاوز يفط مش بس يتنطط

انت عملت فيا ايه بالظبط !!

انا مش قادره أقلك انى بحبك .. لانى مش عارفه فعلا اذا كنت بحبك ولا لأ ..

بس هو كل ده معناه ايه؟؟؟

انا بحب حاجه فيك ..

او بحب حاجه فيا مش بلاقيها غير وانا معاك ..

وبقيت بعيشها بسببك وانت مش موجود

يمكن أكون معجبه بيك ..

انا اللى اعرفه انك بقيت مهم فى حياتى وخلاص .. تحت اى اسم .. مش هتفرق معايا المسميات المهم انك بقيت فى حياتى وخلاص .. وانا مش عايزه اكتر من كده.

كنت مستنيه العيد السنه دى

2011-08-29T23:46:00.000+02:00

احساس حلو حسيته النهاردة وانا بستعيد ذكرى جميلة من ذكريات زمان، أيام ما كنا بنقعد قدام التلفزيون مستنيين رؤية رمضان مش عارفين هو بكرة رمضان ولا بعد بكرة .. طيب هو بكرة العيد وخلاص رمضان على كده ولا برضه لسه شوية ..كانت الاسرة كلها بتتلم قدام التلفزيون مع بضعها ..

انا شخصيا كنت ببقى مستنيه القرآن اللى فى بداية الجلية يخلص بفارغ الصبر وبقولهم ما ينفعش تقرآوا قرآن وتدوا دروس ومحاضرات بعد ما تقولوا هو امتى بالظبط .. وماكنتش بفهم لما المفتى بيقول ان غدا هو اليوم المتمم لشهر شعبان .. دايما كنت بسأل ماما هو ده كده معناه ايه .. بكرة ولا مش بكرة يعني ؟؟؟

ولما كبرت وفهمت بطلت اتفرج عليها .. خلاص الأرصاد الفلكية بقت بتحسبها قبلها بشهور وشهور والقعده اللى بيقعدوها كل سنة دى ما بقاش لها لازمة بقت مجرد قعدة صورية علشان تتصور وتطلع فى التلفزيون وخلاص .. ومش عارفه بصراحه اذا كانوا لسه بيجيبوها فى التلفزيون ولا خلاص كده ..

لكن المره دى الناس كانت متلخبطه شوية ومش عارفين هو العيد بكرة ولا بعده.. وكله مستني دار الإفتاء بعد الأفطار هتقول ايه ..

انا الاحساس بانى لسه مش عارفه ده فرحنى قوى .. حسسنى انى لسه صغيره زى زمان .. وان فيه حاجه لسه مستنياها وعايزاها تحصل ..

هو أكيد ان حاجات كتير قوى فى حياتى اتغيرت النهارجه عن امبارح واللى كان مش هيرجع تانى ومش هيتكرر مهما حصل بنفس صورته . لان الدنيا مش بتقف على حالة .. بس لما يحصل ان من وقت للتانى حاجه صغيرة تفكرك باللى فات .. بيبقى احساس حلو قوووى بجد

كل سنة وانتم طيبين .. وعيد سعيد مليان بالضحك والزقططة .. واللعب والحب .. ياااارب

فى نهار رمضان

2011-08-27T21:49:00.000+02:00

خلينا نتكلم بصراحه الموضوع ما يكسفش لكن محتاج تشغيل عقل ودماغ يعني، كلنا عارفين ان ربنا خلق المرأة ليها طبيعيه جسدية مختلفه عن الرجل بتناسب دورها فى الحياة، ومن اختلافها الشيء المعروف باسم "الدورة الشهرية" او فترة الحيض واللى بتنقى جسم المرأة من سموم كتير ودم فاسد بالتأكيد هيأذيها لو فضل جواها، ومن رحمه ربنا بعباده انه اسقط عن المرأة فى فترة الحيض الصلاة والصيام ..

وبنطلع من هنا بنتيجة ان كل البنات بتجلها أيام بتفطر فيها فى رمضان برخصه من ربنا ورحمه منه، لكن ده مش معناه أبدا ان البنت اللى جالها الحيض تاكل فى نهار رمضان كده عيني عينك قدام الناس كلها وكأن الحياء والخجل كله اختفى من جواها. "و من يعظّم شعائر الله فإنّها من تقوى القلوب " الحج

اللى استفزنى ان اكتب الموضوع ده انى النهارده وانا فى الموول " مكان شغلى" شفت واحده رايحه تقف مع اصحابها فى حته هادية شوية .. قال يعنى الرجل هاديه فيها والمكان ما فيهوش ناس .. مع انى واحد ناس اهو وكنت معديه وفيه "طبعا" ناس تانيه غيري بتعدى عادى جدا .. وكانت بتاكل بطاطس من ماكدونالز، وهى لابسه طرحه .. يعني مش هشك وأقول يمكن مسيحيه مثلا .. بصراحه انا اللى اتكسفت وهى ولا فارق معاها أى حاجه، يعني ربنا بيسترنا من عنده فنيجي احنا ونفضح نفسنا.

المفروض فى الحاله دى البنت تاكل وتشرب وتعمل اللى هى عايزاه بس وهى لوحدها، ده لو حتى أمها وعارفه انها فاطره ومش صايمه المفروض ما تشوفهاش وهى بتاكل كنوع من ..الحياء مع الله .. " الله حيي يحب الحياء" ما ينفعش احنا نتعامل معاه بدون حياء.

انا مش هقول غير بس ربنا يهدينا جميعا ويصلح حالنا، لأن رمضان جه وبيخلص أهو والناس مش حاسه بأى حاجه، اللبس المستفز بتاع البنات زاد استفزاز فى رمضان، الناس اللى بتشتم وبتغتاب ولا فرق معاها رمضان من شعبان، السرقة والبلطجه و "قلة الأدب" شغاله زى الفل وكان رمضان معداش على ادراك الناس ومش مستوعبين انه شهر فى السنة يا نلحقه ويتغفر لنا فيه ونكسب رضا ربنا ورحمته وجنته، يا اما يعدي زى ما جه وساعتها هنبقى خسرنا حاجه كبيرة قوى ممكن ما نعرفش نعوضها تانى لان ممكن يكون ده آخر رمضان لينا فى الحياة..

يارب تخرجنا من رمضان بصوم مقبول وذنب مغفور وعمل متقبل يالله ..

كــــنـــــــا

2011-08-27T11:26:00.001+02:00

كنا أحبه ذات يوم، او هكذا كنت أظن، لكن الان عندما اتذكر كل ما مضى لا اشعر فى قلبى بذرة حب تجاهك وكانك لم توجد فى حياتى يوما، لا أكرهك أيضا لان الكره يعني انك شخص مهم لدرجة انك أخذت جزء من تفكيري ومشاعرى ووجهتهم لكرهك، لكنك شخص غير مهم باى درجة، لا أحبك لا أكرهك، لا اشعر بشيء تجاهك، واتعجب بين حين وآخر كيف أحببتك ولماذا ؟؟ او لنكن أكثر صدقا وواقعيه، كيف تخيلت يوما انى أحبك ورسمتك فى لحظة فارس لأحلامى وانت بعيد كل البعد عن أى مما اريده فى فارس أحلامى.

ولتنظر الى نفسك، انت ايضا، فأنت لم تحبنى يوما ولا تعرف ما هو الحب، انك لا تعرف سوى حب السيطرة والتملك والتحكم، وكأن العالم كله عبيدك وانت سلطانهم تحركهم كما تشاء، ومن يعصيك تعلن عليه غضبك وسخطك، فطوال تلك الفترة التى ظننتنا فيها أحبه لم اشعر يوما معك بالأمان، لم تعطينى شيء واحدا من أحلامى، ولم تمسح دمعه واحده من دموع عيني ولا قلبى، كنت تطلب وتطلب فى كلامك وفى صمتك، ولم تعطى شيء ولم تعرف كيف تعطى،

واليوم بعد ان افترقنا وضاعت بيننا كافة الخيوط، تريد ان تأمر فتطاع!! هل تتوقع منى ان أحبك واحافظ على ذلك الحب بداخلى فى فراقنا وانا كنت اتعذب به فى قُربنا، هل تتوقع منى ان اقبلك ضيف فى حياتى يتحدث ويتدخل فيها ويمزح ويضحك وكاننا أصدقاء وكأننا لم نتعاهد يوما على الحب ونحاول ان ننجح فيه، وفشلنا وافترقنا وابتعدنا، هل تتوقع منى ان اقبلك "انت" بأى صورة مرة أخرى فى حياتى، حياتى التى عادت الىّ، حياتى التى امتلكتها من جديد بعد ان كدت أفقدها بسيطرتك وآرائك.

لا تتهمنى الآن بالقسوة واللامبالة، ولا تتهمنى بانى لا أعرف الحب ولا استطيع ان احب، فلتنظر الى نفسك أولا ثم لتحادثنى، فأنت لم تستطيع ان تحبنى ولم تقدرنى يوما، لم تقترب من روحى لتعرف كيف يمكن لقلبى ان يعشق وان يبذل من أجل معشوقه، انت لم تبذل اى مجهود للوصول الى روحى، كنت فقط تبذل المجهود للنظر الى جسدى، الى لون بشرتى وعيني، الى شعرى ودرجة نعومته، لم تفكر فى ديني ولا أخلاقى ولا عقلى، لم تفكر فى اى شيء من تلك الأشياء التى كنت انتظرك يوما ان تغازلنى فيها.

فاليوم وانا هنا بعيدة بعيدة بعيدة عنك ولا اعرف اين هو مكانك ولا أريد ان أعرفه ، لا اشعر باشتياق ولا حنين، ولا حتى آلم وندم، صدقا لا اشعر بشيء ولا اعرف كيف!!

ارحل فى هدوء وان كنت لا تعرف ما هو الهدوء فلترحل وتنتهى من وجودى، لا اذكرك ولا تذكرنى، فأنا لا أريدك ولا أريد أي من أفكارك ولا كلامك ولا أى شيء له علاقة بك، فحياتى أجمل كثيرا بدونك، يكفى ان بها أمل

لما بفتكرك !!

2011-08-26T18:09:00.000+02:00

بيحصل ايه لما بفتكرك ؟؟

بلاقى نفسي ببتسم ابتسامه طفل عامل عامله وبيداريها عن أهله

بلاقى قلبى بيدق بيدق بيدق

بلاقى صورتك وانت بتبصلى وبتضحك منوره خيالى

بلاقى نفسي بسرح فجأة .. بسرح فيك

فى كلامك معايا .. فى كل حرف قلتلهولى

بطبعى ما بفتكرش تفاصيل الكلام

لكن معاك بفتكر احساس كل الكلام

حياتك اللى دخلتنى جواها

بتفاصيلها الصغيره قبل الكبيرة

وحياتى اللى انت بقيت كل حاجه فيها

عنيك وهى بتبصلى .. بتسرح جوايا

وبتخطفنى منى .. وبتاخدنى عندك

ايه بس اللى بيحصلى لما بفتكرك ..؟؟

مش بنساك أصلا علشان افتكرك

ومش بتغيب عن بالى ولا فكرى ولا عينى ولو لثانيه

بتعيش معايا فى تفاصيل حياتى كل يوم

فى كل مكان بروحه، ومع كل الناس اللى بقابلها

بتكون معايا وانت مش موجود

بتعيش جوايا .. فى أحلامى ويقظتى

بتبقى أجمل لحظات يومى اللى بفتكرك فيها

وانت بتتكلم .. وانت بتبتسم .. وانت بتتخانق

انا بيحصل حاجات كتيره قوى جوايا لما بفتكرك

احساس غريب بالسعادة

وكلمة "يارب" ما تفارقش

لسانى وقلبى

ماشى يا دنيا

2011-08-24T12:38:00.002+02:00

هنضحك للدنيا وفى الاخر هتضحك علينا هى، هنعاملها ببرائه وببساطة هتعاملنا هى بقسوة ، هنحاول نفهمها هتضحك علينا وتفهمنا اللى هى عايزنا نفهمه مش اللى المفروض نفهمه، يعني مهما حاولنا نراضيها ونعاملها بحنيه دايما بتدينا على دماغنا، وزى ما قالوا زمان دنيا غروره ومالهاش أمان.

مالى فجأة بقيت متشائمه كده ليه .. وانا اللى دايما كنت بقول اضحك للدنيا تضحكلك وعلى قد ما بنديها حب على قد ما بناخد منها حب .. مش عارفه !!

بس يمكن لانى كل يوم بحس انى ما كنتش صح قوى، وان الدنيا اللى بجد اللى الناس عايشه فيها اكبر بكتير من الدنيا الصغيره اللى انا كنت عايشه فيها، مع ان طول عمرى بخرج وبقابل ناس وبعمل حاجات كتيره قوى فى أماكن كتيره قوى من أعمال تطوعيه وخيريه وشغل على صغير من غير مقابل، بس برضه كانت دنيتى صغيره، او يمكن انا اللى كنت بفتح الشباك على اللى انا عايزاه بس، وبغمض عيني عن اللى مش بيعجبنى وكانه ما حصلش.

كنت بفكر انى بكده بلغيه من الوجود، وانى بالشكل ده بخلق دنيا جديدة جميلة وبريئة وهادية زى اللى فى خيالى، لكن مع كل يوم بعيشه فى الدنيا بحس انى كنت غلطانه، وان الدنيا مش قناة سبيس تون، مش كل حاجه فيها ممكن تطنش وتعدى، وتطلع فى الأخر مجرد حلم، مش كل غلطه بنعملها ممكن مسحها من دماغنا بزرار ديليت، او حتى نطنشها ونقول عادى ما كلنا بنغلط.

مع كل يوم بعيشه بشوف فيها حاجات جديده وبكتشف حاجات غريبة عمرى ما كنت أتخيل انها موجودة بجد، حاجات كنت بس بسمع عنها من بعيد، كنت بشوفها فى التلفزيون وماكنتش بصدقها.

الدنيا طلعت كبيره قوى، وفيها حاجات تخوف، واكتر حاجه بتخوفنى منها انها تغيرنى، وانا بحب نفسي كده، بحب دماغى اللى لسه بتفكر زى طفله عندها 5 سنين، وبحب قلبى اللى بيحب كل الناس من غير حدود ولا شروط، بحب نفسي اللى بتتعامل ببساطة وتلقائية وحسن نية، وبخاف من الدنيا اللى مش بتسيب حد فى حاله ..

بداية ونهايه

2011-08-23T21:12:00.000+02:00

لكل شيء بداية ونهايه ..

لكل بداية نهايه واى نهايه لازم كان لها بداية

ودايما بنقول ان البداية بتبقى صعبه .. شيء جديد ومش متعودين عليه

وبياخد وقت لحد ما نتعود عليه ويبقى مألوف فى حياتنا

لكن اللى بيهون اى بداية هو الطريق اللى بنشوفه من بعيد

الطريق اللى لسه هنمشيه

يعني اننا لسه هنعيش شوية فى التجربة الجديده

لسه قدامنا شوية وقت نستمتع سواء بحلاوة التجربة ، او نحاول نحسنها لو كانت مره

الأصعب هو النهايه .. النهايه اللى بيكون معاها وداع وفراق

مهما كانت الفتره اللى عشناها فى التجربة الجديده طويلة او قصيره

لكنها كانت فتره فى حياتنا .. وهتبقى جزء من ذكرياتنا

واصعب النهايات هى النهايات اللى ما فيش أمل فى رجوعها تانى

وحتى لو رجعت اكيد مش هترجع زى ما كانت بنفس تفاصيلها ..

يمكن أه لازم حاجات تنتهى علشان حاجات تانيه تبدأ

وهى الحاياه كده ما بتقفش على حاجه ..

الحلو بيعدى والوحش برضه بيعدى ..

بس فى اللحظات الاولى بعد ما بنوصل للنهايه بتحصلى حاله غريبة

حاله شجن .. وتأمل لفتره من عمرى عشتها

فترة أكيد أثرت فيا بصورة من الصور

مهما كانت حلوة او وحشه بتوحشنى ..

بس أكيد لو كانت فترة حلوة التأثير اللى بتسيبه جواى لما بتخلص بيكون أكبر

بكون فرحانه باللى عشته .. وحزينه انه خلص ..

اننا وصلنا للنهايه ..

كلامى مش راكب على بعضه

بس انا حساه .. ومطلعاه من جوايا

بقالى سنة باخد كورس مع نفس المجموعه من الأصحاب

والكورس أخيرا خلص ..

فرحانه انى أنجزت شيء فى حياتى ..

استفدت واتعلمت كتير فى الفترة دى

واتعرفت على ناس جميلة جدا .. هفضل فكراهم طول عمرى

لكن الكورس خلص

ومهما حصل مش هنتجمع كلنا تانى بنفس الصورة اللى كنا بنتجمع بيها

الشيء اللى كان بيربطنا خلص ..

كان شيء حلو وانتهى نهايه حلوة ..

لكن فى النهايات مش بتفرق كتير حلوة ولا وحشه ..

لأن مع الزمن هتفضل منها مجرد الذكرى اللى عشناها

اكيد لو كانت نهايه حلوة هنبتسم واحنا بنفتكرها

ولو مره هنتالم ونقول يارتها ما تيجي على بالنا تانى

لكن فى النهايه بقى .. انا بطبيعتى عشرية

برتبط بالناس والأماكن والحاجات اللى حواليه

ومع الوقت والعشره بيتكون بين وبين كل اللى حواليه روابط جميله

وبتمنى لو تعيش لحد ما اموت .. وبعد ما اموت كمان

تعيش بنفس الصورة الجميلة اللى انا عايشاها ..

فى علاقتى مع أصحابى ..

مع الولاد بخاف ان اى حد منهم يحبنى وانا ما احبهوش ..

أو العكس

وأفقد علاقة جميلة قوى بتربطنى بيه

علاقة صداقة وأخوة مش بتيجي بالساهل

ومع البنات .. بخاف برضه حد يدخل فى النص يبوظ العلاقة الجميلة

لان علاقاتى مع الناس والأشخاص اللى بيعيش معاهم مهمه جدا فى حياتى

علاقتى كمان مع الأماكن اللى بقعد فيها علاقة غريبة

لما بروح أصيف فى مكان واقعد فى شقه اسبوع مثلا

بحس انها زى بيتى وبجد ببقى متأثرة جدا وانا ماشية

ولازم أتصور فى كل ركن فيها علشان احتفظ بيها للذكرى

علاقتى وارتباطى بالاشياء علاقة غريبة ..

وبما ان دمعتى اصلا قريبة

فالعلاقة دى بتأزمنى نفسيا جدا ..

يااارب يكتبلنا دايما البدايات السعيدة

والنهايات السعيدة

والحياة السعيدة

ومتأسفين على الموضوع الملخبط ..

انا كتبته وما رجعتهوش ومش هرجعه

هسيبه بغلطاته وسلطاته كده ..

لانه طلع من قلبى .. فهسيبه باحساسه كده زى ما هو

بس انت تيجي .. فى وقتك

2011-08-21T23:09:00.000+02:00

نفسي اشب على أطراف صوابعى ويادوب ابقى طايله بايدي كتفك بالعافيه ..
احط راسى على كتفك واغمض عنيا ..
وارفع ايدي والفها على رقبتك واضمك لحضنى جامد .. جامد قوى
ياااااااااااه .. انت كنت فين من زمان ؟؟
كنت فين ؟؟
وازاى كنت سايبنى كده لوحدى ؟؟
وازاى هنت عليك ؟؟

انا مش زعلانه منك .. ما اقدرش ازعل من نفسي
انا بس بعتب عليك انك ما جيتش من بدرى
بعتب عليك انك سبتنى لعيون الناس وكلامهم كل ده
ولا أقلك .. مالوش لازمة العتاب ..
اللى فات كله مالهوش اى لازمة
اللى جاي "معاك" هو الدنيا وما فيها
هو المهم والأهم

انا نفسي أغمض عيني وافتحهم الاقيك مش حلم
ألاقيك أحلام وحقيقة وحياة
بس مش هفتحهم دلوقتى .. انا مطولة شوية المرة دى
تعالى على مهلك ..
علشان تجيلى فايق ورايق .. تيجى علشانى بحريه
تعالى بسرعه وبهدوء ..
وما تبصش كده ولا كده فى السكة احسن انا بغير قوى
واتأخر شوية كده اكون استعديت لك الاستعداد اللى يليق بيك
وتعالى بسرعه لانك واحشنى ..
بص انت تعالى فى طيارة وعلى سلحفاة ..
المهم فى النهايه انك تيجي فى وقتك "صح" ومكانك "صح .. المهم تيجي مظبوط

David Hasselhoff - DU

2011-08-21T22:33:00.004+02:00

You may not understand it, but sure you will feel it, music is such a special language that is in no need of learning new languages, it's just in need of having a sensitive feeling, and a great heart that open to hear and enjoy it.

by the way, these song is in my lovely language GERMAN

@ the End you will find the lyrics in German as well as in English

In Deinen Augen steht so vieles, was mir sagt.

Du fühlst genauso wie ich.

Du bist das Mädchen, das zu mir gehört,

Ich lebe nur noch für Dich.

Du bist alles, was ich habe auf der Welt,

Du bist alles, was ich will.

Du, Du allein kannst mich versteh'n,

Du, Du darfst nie mehr von mir geh'n.

Seit wir uns kennen, ist mein Leben bunt und schön,

Und es ist schön nur durch Dich.

Was auch gescheh'n mag, ich bleibe bei Dir,

Ich lasse Dich niemals im Stich.

Du bist alles, was ich habe auf der Welt,

Du bist alles, was ich will.

Du, Du allein kannst mich versteh'n,

Du, Du darfst nie mehr von mir geh'n.

Du, ich will Dir etwas sagen

Was ich noch zu keinem anderen Mädchen gesagt habe,

Ich hab' Dich lieb, ja ich hab' Dich lieb

Und ich will dich immer lieb haben

Immer, immer nur Dich.

Wo ich auch bin, was ich auch tu

Ich hab' ein Ziel und dieses Ziel

Bist Du, bist Du, bist Du.

Ich kann nicht sagen, was Du für mich bist,

Sag, dass ich Dich, Dich nicht verlier'.

Ohne Dich leben, das kann ich nicht mehr,

Nichts kann mich trennen von Dir.

Du bist alles, was ich habe auf der Welt,

Du bist alles, was ich will.

Du, Du allein kannst mich versteh'n,

Du, Du darfst nie mehr von mir geh'n.

************

and these is the best translation I found for it ..
enjoy

Your eyes they tell me all the things you mean to say
I, feel the same way as you
You, are the first girl to count in my life
I, I live only for you

You alone are all I have in this world
You, alone, you're my girl
You...only you can understand
You...you say I'm your only man

My life has changed since the day we first met
You brought the sun to my day
All through my life girl, I'll stand by you
Please say you always will stay

You alone are all I have in this world
You, alone, you're my girl
You...only you can understand
You...you say I'm your only man

Darling,
I want to tell you something
That I've never told to anyone before
Not to anyone
I love you
And I will always love you
Darling, always, only you...

Oh, what a world we both go through
One thing is true
My only love is you, is you, is you...!
I can't explain the things you mean to me
Words, they are just, just not enough
Without your love girl, I know that I'm lost
I, I just live for your love

You alone are all I have in this world
You, alone, you're my girl
You...only you can understand
Oh, you...you say I'm your only man
You...only you can understand
Oh, you...you say I'm your only man

Oh, You...

Puzzle of my heart

2011-08-21T22:14:00.000+02:00

An amazing song, that makes me fly and feel such a peaceful feelings.

It's the way she fills my senses
It's the perfume that she wears
I feel I'm losing my defences
To the colour of her hair

And every little piece of her is right
Just thinking about her
Takes me through the night

[Chorus]
Every time we meet
The picture is complete
Every time we touch
The feeling is too much
She's all I ever need
To fall in love again
I knew it from the very start

She's the puzzle of my heart

It's the way she's always smiling
That makes me think she never cries
I feel I'm losing my defences
To the colour of her eyes

And every little piece of her is right

[Chorus]

Like a miracle she's meant to be
She became the light inside of me
And I can feel her like a memory
From long... ago

[Chorus]

Every time we meet
The picture is complete
Every time we touch
The feeling is too much

Every time we meet
The picture is complete
Every time we touch
The feeling is too much
She's all I ever need
To fall in love again
I knew it from the very start
She's the puzzle of my heart

هو ليه بيحصل كده؟؟

2011-08-21T02:51:00.003+02:00

هو ليه من وسط الناس الكتيره اللى بنقابلها فى حياتنا بنختار واحد بس علشان نسلمه قلبنا ونبدا نحلم معاه ونحلم ليه ونحلم بيه، ويبقى هو كل حاجه فى حياتنا، يبقى هو اهم شخص ونفكر فيه ونشغل دماغنا بيه ليل ونهار، ومن كتر التفكير فيه واحنا صاحيين نحلم بيه واحنا نايمين واول حاجه بتخطر على بالنا اول ما نفتح عنينا الصبح بيكون هو نفس الشخص اللى عايش جوانا.

ليه بنسرح جوا عنين مش واخده بالها مننا، ونعيش جواها ونحس بحاجات كده غريبه ، حاجات مش بنعرف نتكلم فيها ولا نتكلم عنها، بس بنعرف نبتسم كل ما تيجى على بالنا، حاجات كده بنتمنى لو مدتها تطول شوية او شويتين كده، وتبقى اللحظات اللى بنسرح فيها جوا عنيه هى احلى اللحظات اللى بنعشها فى يومنا، ونشتاقلها لو بس بربشنا بعنينا لحظة.

ليه بنحب حلمنا الصغير اللى بدانا نرسمه على ضي وجوده فى حياتنا، ونخاف عليه وعلى حلمنا، ونبدا نفكرله ونفكر فيه، نبدا نعيش فى حالة كده وكاننا بقينا مسئولين عنه وفى نفس الوقت مسئولين منه، ويبقى اجمل احساس لما فى لحظة يقول حاجه او يعمل تصرف تحس منه انه مهتم بيك او خايف عليك او حتى يعني بتخطر على باله فى لحظات وانت مش قدامه..

ليه بنختار واحد بس نبقى مستعدين نسلمه اغلى حاجه فى الدنيا "عمرنا" ومستعدين نستغنى عن كل حاجة فى حياتنا علشانه ، وكمان هنكون مبسوطين وفى قمه السعادة، ليه دايما البنت بتحس بسعادتها لما بتدى حبيبها حياتها وعمرها وأحلامها وبرائتها وطفولتها ، وبتحس انها ملكة بعطائها واحساسها وحبها.

وليه بتكون اجمل حاجه تغمض عليها عينيك هى صورة فى خيالك لطيفه وهو بيبتسم لك وبيقولك تصبح على خير، واجمل حاجه ممكن تسمعها هى صوته بيقولك وحشتنى، واجمل كلمة نفسك تسمعها منه، بحبك

هو ليه فى أحلام بتبقى حلوه قوى وهى بعيده، وبنخاف منها قوى لو قربت، نفسنا فيها ومش عايزنها، حبناها وهى مجرد حلم وحاجه بعيده نفسنا فيها، وخايفين لو قربت ما تبقاش زى ما اتمنيناها.

ليه الحب هو اجمل حاجه فى الدنيا، واكتر حاجه بتفرحنا وتضحكنا، واكتر حاجه ممكن تقتلنا وتبكينا.

لا تبكى ... تسجيل صوتى

2011-08-20T01:29:00.000+02:00

هو الموضوع اللى كتبته قبل شويتين كده

تحت عنوان لا تبكى

فكرت أسجله .. واشوف ايه رأيكم فى فكرة تسجيل التدوينات بصوتى

هل يا ترى فكرة كويسه ولا بتضعف من معنى الكلام ؟؟

لا تبكى

2011-08-19T20:04:00.000+02:00

لا تبكى الآن .. فلم يحن بعد وقت البكاء

ربما سيأتى لاحقا .. لكننا الآن نقف فى قاعه التفكير

علينا ان نفكر ونفكر .. لا وقت للبكاء

ربما يأتى وقتا للتأمل والنظر فى كل ما فكرنا فيه من بعيد

وربما علينا ان نبتعد عن انفسنا قليلا لنرى الصورة كاملة من بعيد

لكن ينبغى على كل حال ان نوقف كل ما نفعله الآن

وألا نترك حياة لأى شيء سوى عقلنا ليفكر

لا تبكى الآن .. لان الدموع ستضعفك وانت فى حاجه الى القوة

القوة التى بها ستقف على قدميك لتستكمل حياتك

القوة التى ستقف بها وحدك بعيدا عنى مبتسم للماضى

حينها سأكون انا جزء من ذلك الماضى ..

جزء من ذكرياتك التى كتبتها فى ماضيك بيدك وقلبك وجزء من عقلك

وقتها ستنظر الى بعيد بعينيك

ستسرح فى شيء غير موجود .. وتبتسم ابتسامه صغيره

ابتسامة ربما لن يصل تأثيرها الى قلبك

لكنك ستبتسمها بحكم العادة ..

وستستكمل حياتك فى سلام .. وكأن عمرك لم يعبر الى محطتى ابدا

قصة حب .. عمرو ودعاء

2011-08-19T01:19:00.000+02:00

قصة حب جميلة بدات النهاردة بيني وبين عمرو .. اسمحولى اناديه حبيبي يعني

حبيته من اول نظرة .. لانه ما ينفعش تعمل معاه اى حاجة تانية غير انك تحبه .. ومن .. اول نظرة كمان وهو كمان حبنى بس ممكن نقول بعد ربع ساعه كده

قالولى عنه ده تنك ومش بيكلم اى حد ومش بيقبل اى حد بسهولة ..

يعني مش اى حد بيعجبه .. بس على مين لست انا ..

بدات قصه حبنا من اول ما اتكلمت معاه وبدات اناغشه واحاول اقرب منه

قعدنا نتكلم ونلعب ونضحك انا وهو .. وكل اللى كانوا معانا غاروا منى وبداوا يقربوا مننا

بيحاولوا يقربوا منه وياخده حته من قلبه زى ما انا عملت .. بس برضه على مين

اكيد ما فيش زى دودو .. الحب الحقيقي بيبان .. وانا حبيته من قبل ما اشوفه اصلا .. من مجرد كلام سمعته عنه من بعيد

وعلى كده بقى احنا طول اليوم .. مش بيكلم حد غيري ..

ومش بيقعد جنب حد غيرى ومش بيسمع كلام اى حد غيرى انا اصلا ..

واجمل لحظة بقى لما لقيته جايبلى وردايه وبيدهالى انا دونن عن كل البنات اللى معانا

يا حبيبي يا عمرو .. للدرجة دى حبيتنى .. وبسرعه كده

انا بجد حبيته قوى .. حبيت ضحكته وبرائته اللى مالهاش زى

حبيت نفسي اللى هو حبها .. واتمنيت ربنا يرزقنى بواحد زيه

وطول الطريق وانا مروحه مش بدعى غير بالدعوه دى

يارب ترزقنى بالذريه الصالحه .. يارب ترزقنى وما تحرمنيش

عمرو ابن اخت صحبتى .. عنده 6 سنين

وكان مكسوف جدا فى بداية القعده ومش بيكلم حد خالص

ولما انا قلتلته ممكن العب معاك يا عمرو قالى تعالى

ومن ساعتها بقينا اصحاب .. وبجد ما كانش بيسمع كلام حد غيري

ولا عايز يقعد مع حد غيري .. وما اعرفش ليه

بس اكيد هو حس باللى جوايا والاطفال بيكون حبهم خالص لوجه الله

ما بيكونش جواهم اى اطماع بشريه .. ولا الوان اسود واخضر وفحلوقى

خلانى العب وارجع لايام الطفولة بتاعت زمان

اتمرجحت زى ما اكون قده وعندى ست سنين انا كمان

وكان هو اللى بيزقنى على المرجيحه كمان

خلانى اضحك من قلبى واضمه فى حضنى وانا بجد فرحانه

بس خلانى اشتاق فوق شوقى الكبير قوى لانى اكون ام

الاحساس اللى بيموتنى بجد .. بحب الاطفال جد وامنيه حياتى اكون ام لاطفال كتير

اكون ام صالحه وكويسه .. واربى اولادى زى ما بيقولوا احسن تربية

بس بجد تبقى احسن تربية .. دينيه واخلاقيا واجتماعيا وعلميا وثقافيا

احساس الامومة اللى بيكبر جوايا كل يوم ..

بيكبر اكتر لما اقرب من طفل والعب معاه والاقيه عسول واحبه ويحبنى

ببقى هتجنن ويبقى عندى ابنى .. بتاعى انا .. ملكى انا

يقولى يا ماما .. نلعب انا وهو طول النهار والليل

اسيب حياتى ودنيتى كلها علشانه .. اكيد اكيد مش هيبقى فيه فى حياتى حد اهم منه

ياااه .. انا خايفه اعيط وانا بكتب الكلام ده .. او شكلى عيطت فعلا

انا هقفل كلام على كده وانا بدعى ربنا فى الايام المفترجه دى

يااااااااااااااااااااااااارب

يارب ترزقنى وما تحرمنيش يارب ..

يارب تحققلى احلامى يارب .. وتسعدنى فى باقى ايامى

يارب ابقى ماما .. قريب يااااااااارب

هدوء نسبي

2011-08-18T01:33:00.000+02:00

لحظات من الهدوء وشوية استجمام

نفسي انام قدام البحر .. اغرق فى لونه واسرح مع صوته

نفسي فى شوية هدوء .. شوية جمال .. شوية برائة

يمكن اكون بضحك .. ويمكن اكون بحب اللى بعمله فعلا

بس فى اوقات ببقى نفسي حد يحس بيا ويحس بالحاجات اللى انا مش عارفه اقلها

حد يفهم ان مش دايما بيكون ورا الضحكه دى ضحك من جوايا

او على الأقل مش دايما بكون مبسوطه ومرتاحه قوى وانا بضحك زى ما هو باين عليا

علشان كده بحلم بالبحر .. اللى بعشقه وبيوحشنى وانا جواه

لان البحر بيعمل جوايا مفعول ما يقدرش عليه اكبر معالج بالطب الطبيعيى والهوكس بوكس دول

صوت البحر بيعيشنى فى حاله من الشجن مالهاش مثيل ..

مع لونه بدرجاته الزرقا البديعه سبحان من خلقها ولونها يعني ..

مع نسمات الهوا اللى بتعمل فى الواحد برضه حاجات غريبه .. كانها بتفوقه من موت وبتقوله اصحى .. انت انسان .. انت لسه عايش

مع ريحه الملح وريم البحر ..

مع شمسه الجميل .. اللى مهما حرقتنى بحبها وبستحملها ..

هو كده البحر معايا .. بيغسلنى حتى لو ما نزلتهوش

وكل ما احس انى فى دوشه وبجرى ورا نفسي وحياتى اتزحمت مره واحده

بحس انى محتاجاله قوى .. محتاج اقف على شطه شويه علشان يرجعلى الهدوء

ولانى بعيده جدا جدا عنه وممكن اقعد كذا سنه ما اشفهوش فيها

بحلم بيه .. وبفتكر اخر مره وقفت فيها قدامه ..

وسلامى ليه وانا بقوله ان شاء الله هرجعلك تانى . وان شاء الله ما اكونش لوحدى ويكون معايا حبيب نتمشى على رملك وادينا فى ايد بعض ..

بس بجد بقى .. انا نفسي فى شوية هدوء ..

نفسى ابعد فجاه عن كل الناس ..

اقفل الموبايل

اقفل الفيس بوك وتويتر

واقفل البلاك بيرى

.. ايه كميه الاختراعات دى :(

مش بقلكم الدنيا بقت دوشة

ومع ده كله ما انزلش الشغل كمان واقعد اسبوع مغمضه عنيا ..

افضى دماغى

انسي كل حاجه بتحصل خارج حدود اوضتى

انسي الناس .. وينسونى هما كمان

ما اكلمش اى حد وما اتكلمش فى اى حاجه

يمكن لما اعمل كده ارتاح شوية .. واحس بالهدوء بدل الدوشة اللى الحياة فيها

وبدل ما الواحد حاسس انه بيجرى ورا نفسه وماعندوش وقت يفكر حتى هو نفسه فى ايه .. او بيحلم بايه .. او حتى عاوز ايه من بكره

هو بيتحرك وخلاص لان ما فيش وقت نقعد على جنب ونفكر

ولان حلمى البريء ده مستحيل .. انا قررت اسجله فى المدونه يمكن فى يوم من الايام اقدر احققه وساعتها هرجع للموضوع ده واقول .. اللى كتبته لقيته .. هيييييييييه :)))

رسالة الى حبيبي ... 3

2011-08-17T01:11:00.000+02:00

حبيبي، حبيبي اللى نفسي اقابله بقى ومشتقاله بجنون

عارف .. انا خايفه أحبك .. اصل اللى انت ما تعرفهوش انى بخاف اعلق قلبى بحاجه .. بخاف احب حاجه وتضيع منى .. وعلى قد ما انا خايفه احبك على قد ما انا نفسي احبك .. احبك بكل الجنون اللى جوايا، بكل عالم الكارتون اللى لسه عايشه فيه .. ببرائتى وأنوثتى .. نفسي أحبك الحب اللى بسمع عنه فى الروايات والأفلام الرومانسية .. الحب الأفلاطونى اللى ما بقاش موجود دلوقتى .. نفسي أحبك حب معاه ما تقدرش تبعد عنى لثوانى .. ما تقدرش تفكر فى واحده تانيه غيرى حتى لو انا بعيده عنك ومتخاصمين ..

عارف .. نفسي أحبك حب يحسدك عليه العالم كله .. حب انت نفسك تحسد نفسك عليه وتبقى معاه حاسس انك ملك ملوك الأرض واسعد اهلها ..

نفسي لما اشوفك اديلك حب ما خطرش فى بالك حتى فى اسعد احلامك علشان تحس انى نعمه ربنا ادهالك وحتى لو مش بتحبنى زى ما بحبك، تقدر حبى وتحبنى على حسه .. حتى لو هتحبنى واحد على مليون من حبى ليك .. انا قابله وموافقة وراضية .. وجودى جنبك .. وحبى ليك هيكفونى .. المهم انك تيجي ..

المهم انك تبدأ .. انى اخطر فى بالك .. انك تحس انك محتاجلى زى ما انا هموت عليك

وتعرف انى بحبك "قوى" من دلوقتى .. بحبك حب غريب .. حب معاه مستعده اوهبك عمرى حتى لو هتعيشه من غيرى المهم تكون مبسوط وسعيد ومرتاح ..

حبيي .. انا نفسي احكى عنك لاصحابى واهلى .. نفسي اتكلم عنك قدام ابويا وامى وانا مش خايفه ومش مكسوفه .. نفسي احس بقى انك بتاعى وانا ملكك ومن حقى احلم بيك وما ابقاش خايفه حد يحس بافكارى وما ابقاش خايفه انى احلم بيك وفى الاخر تطلع سراب .. نفسي احلم وانا مطمنه ومرتاحه .. انا بجد نفسي أحبك .. ولما هحبك .. هحبك حب الدنيا بحالها تشهد عليه ..

:$ وعلى فكرة انا بمووووووووووووووووت فيك

من دلوقتى بقى

فستان السهره الاسود

2011-08-13T15:27:00.001+02:00

أذكر جيدا المرة الأولى التي التقينا فيها، كنت ترتدي بدلتك السوداء وكنت انا ارتدى فستاني الأسود أيضا، فهو لونى المفضل فى ملابس السهره، واول كلمة قلتها لى بعد ساعتين من تبادل النظرات الصامته .. ممكن؟؟

كنت تمد لى يديك فى انحنائه راقية تطلب منى الرقص، رقصنا ورقصنا، كانت تلك رقصتى الاولى ولم اكن اتخيل انى اجيد الرقص بهذه الدرجة، لفتنا انتباه كافة الحضور، فلم يتخيل اى احد اننى وانت يمكن ان نتعرف يوما فما بالك برقصه طويلة.

اشعل صمتك بداخلى بركان من النار ، صمتك فى الرقصه وصمتك بعد الرقص، تركتنى فجأة واستأذنت فى الانصراف، وصرت انا ابحث عنك بعيون مجنونه بين الحضور، لا ادرى لماذا اتيت وكيف ذهبت، ولم اجد لوقفتى تلك فائده فأجبرت على الجلوس وانا احاول ان ادارى نفسي عن عيون الحضور المليئة بالاسئلة.

وعندما رايتك تعود الى القاعه فى خفه وبهاء بعد ذلك بقليل لا ادرى لماذا شعرت باحساس عودة الروح لجسد ميت، وكانما دبت فيا الحياة فجأة .. ولكنه فجأة حقا عندما رأيتك تقف وتتجه الى الميكرفون وتطلب منهم ان يطفئوا الموسيقى قليلا فلديك ما تقوله ..

لا ادرى لماذا ارتبكت انا بمجرد ان امسكت انت بالميكرفون، وما ادرانى انا بما ستقوله!!

وفى كلمة واحده .. نظرت الى عيني مباشرة وامام الحضور جميعا قلتها لى .. تتجوزينى!!!!!!!!!!

ايه ؟؟ نعم ؟؟ ازاى؟؟ فى ايه؟؟ احم احم ...

انك تعنينى انا بكلامك هذا ؟؟!! شاورت الى نفسي باستعجاب وانا انظر خلفى فى حركه تلقائية ابحث عن تلك الفتاة الى تحادثها ، لكنك اوقفتنى بكلمتك مره اخرى وكانك ادركت ما بداخلى دون ان اقوله .. أيوا انتى

احم .. احم ..

....

هذه النقط هى ايمائة راسي لك بالموافقة ..

نعم .. انى على استعداد تام ان اقلب حياتى كاملة .. ان اغير فيها كل شيء .. فقط لكى اعيش ما تبقى فيها معك انت .. انه هو ذلك الحب الذى لا ادرى كيف ولماذا بدا .. وان كنت قد ادركت الان بعد ان قرات مذكراتك لماذا احببتك كل هذا الحب من اول لقاء ..

وجدت

تلك السطور فى كتاب مذكراتك .. قراتهم ولم استطيع ان اكمل الباقى ..

............................................

اعلم انها تعشق الاسود فى السهرات، ومن المؤكد انها سترتديه اليوم لذا سأرتدى بدلتى السوداء انا ايضا

لقد تاخرت كثيرا فى الحضور، الا تعلم انى متلهف الى لقائها وانتظر عيناها بصبر منتهى .. ها هى حبيبتى قد دخلت الى القاعه .... متانقه بريئة جميلة هادئة .. ملكة كعادتها

انها تنظر الى .. يبدوا انها لاحظت وجودى لاول مره منذ سنوات، فبرغم ملازمتى لها فى كل مكان تقريبا الا انها لا تدرك وجودى فى حياتها، ربما من كثره الاشخاص بجوارها او ربما لانى ابالغ فى التخفى حتى لا تشعر بوجودى وحبى، اعشقها فى صمتى واتمنى لو عشت العمر كله فى صمت امام عينها .. لكنها اليوم تدرك وجودى فهاهى تنظر الى عيني مباشرة ..

انها جميلة بحق هذه الليلة .. لابد ان اجعلها ليلة مميزه فى حياتها، فهى تستحق كل ماهو جميل حتى وان لم يعادل شيء من جمالها .. ساطلب منها الرقص واتمنى ان تقبل بى .. فهى لا تعرفنى ولكنها ربما بعد تلك النظرات تدرك انى كائن حى موجود على الارض وتقبل بى .. حتى لو للحظات لاكون قريبا منها ..

عندما توجهت الى حبيبتى كنت فى قمة شجاعتى .. شجاعه لم اكن اعلم بوجودها بداخلى قبل تلك اللحظة، لكنى امام عينها فقدت القدرة على النطق، شعرت انى سارتمى بين احضانها واقبلها كثيرا ارتوى قليلا من جمالها وحنانها اللذان انا فى شوق لهما .. لكنى ما فعلت سوى ان قلت لها .. ممكن؟؟

يالها من كلمة سخيفه للغاية ، ان يكون اول حوار بيننا يبدا بهذه الكلمة ..

لم اسالها اسمها ولم احاول ان اخبرها باسمى .. فانا اعرفها جيدا واعرف عنها ما لا تعرفه هى شخصيا عن نفسها ..

كنت احاول ان استمتع باللحظة الجميلة التى اقف فيها انا قريبا جدا من وجهها .. اشتم رائحه انفاسها .. ويداعب وجههى خصلات شعراها البنى المتطاير .. وتدغدغ انفى رائحه عطرها النافذ .. حتى يدى لم تكن بعد مدركه انها تمسك بيدها .. لم اكن اشعر بيدى وكانها انفصلت عن جسدى تماما واصبحت جزء من جسدها هى ..

لقد بدات افقد السيطرة على نفسي .. فلحظة واحده وسارمى بفمى الى فمها فى قبله طويلة لن يستطيع احد ان يفرقنا فيها .. هل اخبرها صمتى وعيني السارحه كم احبها واعشقها وادوب فيها !! لا ادرى ..

يجب ان اذهب الان لكى اعيد تجميع نفسي التى تبعثرت فى كل مكان ..

بعد اذنك !!

لم استطيع ان اقول غيرها .. فلو زدت بكلمه عليها لقلت لك أعشقك بعدها ..

خرجت من القاعه ووقفت بجوار الباب من الخارج انظر اليك من بعيد .. ملاكى الصغير البريء .. ملاكى الذى لا يضاهيه فى سحره شيء ... كنتِ تحركين راسك يمينا ويسارا وكانك تبحثين عن شيء ما .. هل تفتقديني ؟؟ هل تبحثين عنى انا ؟؟

حبيبتى انى هنا .. اريدك واحبك ..

ماذا .. نعم ساخبرها الان .. فلا توجد لحظة انسب من الان

دخلت الى القاعه مره اخرى وانا اصم اذنى عن كل شيء واغض بصرى عن كل شيء فانا اصب كل تركيزي على شي واحد فقط سافعله الان ..

امسكت بالميكروفون ويدي ترتعش وتتعرق .. لكن ما ان نظرت الى عينيك حتى نسيت قلقى وتوترى .. اخبرتهم بان يغلقوا الموسيقى فان لدى ما اقوله

.. تتجوزينى؟؟

نعم حبيبتى انها انتى وليست اى واحده اخرى .. فان عيني لم ترى غيرك وقلبى لم يعشق فى الكون سواك .. حبيبتى انها انتى وساكون انا ملكا اذا قبلت مولاتى بى ..

.................................

تشهد الايام انها كانت اروع ستون عاما يمكن لانسان ان يحياهم على الارض .. ستون عاما من الحب ، لا اذكر فى يوم اى اساءة وجهتها لى بطريقة مباشرة او غير مباشره .. لا اذكر سوى الحنان الذى غمرتنى به .. معاملتك لى كأنى الملكة التى ترتدى فستان السهره الاسود فى ذلك اليوم الرائع الذى بدات بها فصول روايتنا .. وظلت معاملتك لى هكذا الى اليوم الذى ودعناك فيه عند شاهد القبر الرخامى .. لكنه ابيض وليس اسود .. والزهور التى وضعتها فوقه بيضاء ايضا ليست سوداء .. فانها كحياتى معك .. بيضاء بلون قلبك.

خايفه مره أحب .. أو أتحب

2011-08-13T00:35:00.007+02:00

الموضوع بصوتى
بس التسجيل صوته واطى شوية ابقى على السماعات على الآخر

هو مش الحب المفروض يعني انه اجمل احساس وشعور ممكن اى بنى ادم يحسه ويعيش فيه فى الدنيا دى ..

هو مش الحب قالوا عنه انه بيطمن القلب ويدفى الايد ويريح البال ..

هو مش الحب ده اللى اتكتبت فيه معلقات وروايات واتصورت فيه افلام ومسلسلات بتشهد بحلاوته واهميته فى حياتنا

هو مش الحب ده اللى بنعيشه اليومين دول هو نفسه الحب اللى اتوجد على الأرض من يوم ما ربنا خلق ستنا حواء علشان تكون ونيس لسيدنا آدم ..

هو مش كده ولا إيه ؟؟!!

طب فيه ايه بقى .. لما الحب حلو قوى كده وجميل انا ايه اللى بيحصلى .. ليه كل ما تيجي سيرته قدامى جسمى بيتلبش وبخاف وكأن فيه داء مالوش دوا بيقرب منى وبخاف اتعدى ..

لو حسيت ان فيه حد من اى حته بيفكر بس انه يحبنى او يعجب بيا بخاف واترعب واتلخبط وابقى مش بفكر غير فى حاجه واحده بس .. ازاى اخليه ما يعجبش بيا خااالص .. ازاى اخليه يفضل اخ عزيز مش اكتر من كده ..

ايه الاسباب وايه الدوافع للى بعمله ده .. الله اعلم

احيانا بفسر لنفسي انى بخاف ان الحد ده يحبنى وانا ما احبهوش فاشيل ذنبه .. حتى لو مش بقصدى او مش بارادتى انى ما احبهوش ومش بارادتى ولا ارادته كمان انه حبنى .. بس برضه هحس فى النهايه بالذنب وبحس ان الحل الوحيد انى اكرهه فيا من الاول علشان ما اشيلش ذنبه فى الآخر ..

ونفس الحاله بتحصل بالظبط لما احس انى بدات اميل لانسان معين وبدات افكر فيه واتخيل حاجات كده .. من وجهه نظرى انها حاجات حلوة وبتخلينى مبسوطة للحظات .. بتحصلى نفس حاله الرعب الفظيعه ويمكن اكتر من اللى قبلها .. وبدعى واقول يارب ما اكونش بحبه .. يارب ما تعلقش قلبى بحد .. ياااارب انا مش قد الحب وعمايله .. مش هكون حمل انى احب واحد ما يحبنيش او ما يبادلنيش نفس الشعور .. او حتى يحبنى واحبه والدنيا تفرقنا .. وانا مش حمل فراق وبعاد ووجع قلب .. لالالا انا مش هقدر ..

يعني ولا كده عاجب ولا كده عاجب .. ومع ذلك طول الوقت بحلم بالانسان اللى هحبه ويحبنى

ازاى مش عارفه ؟؟

غريب كلامى مش كده!!

وانا اكتر واحده بتكتب عن الحب .. وكل الناس بتقول فيها دى شخصيه رومانسيه وعاطتشفيه وكده ..

ويمكن الكلام ده صح .. ويمكن من كتر ما انا بفكر بقلبى اكتر من عقلى نص الوقت بخاف على قلبى قووى وبخاف بالتالى على قلوب الناس التانيه كمان .. وزى ما انا عارفه انى مش هستحمل انى ابعد عن حبيبي او انى احب وما اتحبش مش هقبل انى اكون السبب فى ان حد يحبنى وما احبهوش يتجرح بسببى او انى احب واتحب ونتفرق وحبيبي يتعذب بفراقى ..

انا عايزاك تقرا الكلام ده وكانك ما قرتش اى حاجه

عارف ليه ؟؟

لانى ببساطه أجمل حاجه فى الدنيا كبرتها وعقدتها وكلكعتها ..

وانا مش عايزه اعقدك معايا .. كفايه عليا انا عقدى وكلاكيعي

وبمان انى بحب عبد الحليم .. ده انا متاكده من حبه بصراحه

بهديك الأغنيه دى تعيشك فى الموود

إحساس

2011-08-10T15:29:00.000+02:00

الحزن او الفرحه إحساس .. والإحساس مهما اتكلمنا عنه ما بيوصلش زى ما هو .. الإحساس بيتحس .. بيوصل بطريقة غير لفظيه

مش بس فى نظره عين بتنقل كل اللى اللسان ما بيقلهوش ..

لكن كمان فى لحظة صمت ممكن تمر حتى لو فى التليفون .. ممكن تتحس من على مسافة بعيدة من غير وصل ولا لقى .. لأن الاحساس ما يعرفش حدود ولا قيود مادية

الاحاسيس اللى جوانا اكيد اكتر من كونها فرح او حزن ..

بس يمكن انا شايفه ان فى الغالب كل الاحاسيس اللى جوانا بتصب فى الآخر فى فرح او حزن

احنا لو بنحب هنبقى فرحانين .. ولو بعدنا عن حبيبنا هنبقى فى حالة حزن

لو فى حالة غضب فدى بالتأكيد حالة حزن من شيء اتسبب فى انه يخلينا غضبانين

وزيه الغيره والظلم .. وغيرها من الاحاسيس السلبية اللى اكيد بتوصلنا لحالة حزن

وعلى عكسها الاحاسيس الايجابية زى الحب والتفاؤل والأمان ..

دى احسايس بتخلينا نعيش فى حالة من السعادة ..

ويبقى انسان محظوظ جدا اللى يلاقى الانسان اللى يحس بيه من غير ما يتكلم ولا يلمح

لان الاحساس نعمه للاسف مفقودة فى غالب البشر اليومين دول

كل واحد بيحس بنفسه بس وعايز الناس تحس بيه وتقدر مشاعره بس فى المقابل ماحدش بقى عنده استعداد يفهم مشاعر حد تانى او حتى يحاول انه يحس باى حد ..

شمعه ذكرياتى

2011-08-10T01:50:00.002+02:00

كان ينبغى ان تكون الليلة هى ليلة مميزة فى تاريخنا .. نرقص انا وانت تحت اضواء الشموع حتى الصباح .. نتحدث فى اى شيء وفى كل شيء سويا حتى مطلع الفجر ..

كان ينبغى الليلة ان نشعل شمعه جديدة لعام جديد تبدا فيه حكايتنا وكتاب عشنا بداخله لسنوات

لكن "كان" هى صيغة الماضى والماضى ابدا لا يعود .. وما عشناه بالامس ربما يظل مجرد ذكرى عشنا فيها ومهما طالت السنوات فهى فى الماضى وفى ذاكرتنا مجرد لحظات .. واقصى ما يمكننا فعله عن تذكر تلك المدة الطويلة هو التنهد .. وقولنا آآآآآه طويلة .. بلا تعليق وبدون كلام.

سأشعل انا الشمعه الجديدة .. ربما هى ليست شمعه وجودنا معا لعام جديد ولكن شمعه وجودى انا فى الحياة لعام جديد .. شمعه أمل أوقدها لكى اذكر نفسي بانى مازلت على قيد الحياة ..

شمعه تنير فى قلبى الظلمة التى تركتها ورائك عندما توقفنا فى منتصق طريق مجهول المعالم وقررنا الفراق والوداع .. والوحدة

وفى حياتى ان لم تكن الليلة مميزة بوجود شخصك او شخص غيرك فيها ساجعلها انا مميزة بوجودى فى حياتى .. وبوجودى فى الحياة

ما كان يبنغى حدوثه ليس بالضرورة ان يحدث .. المهم ان ما يحدث كان ينبغى حدوثه

وان لم تفهم جملتى .. لا يهم .. فقد جاء الوداع وافترقنا وربما احد اسبابه هو جهلك للغتى .. جهلك فى التعامل مع افكارى ومشاعرى وجرائتى وبرائتى ..

عزيز الراحل عن حياتى .. أرسل لك رسالتى تلك لتعلم ان التقليد القديم مازل موجود

شموع كثيره فى ارجاء المكان

رائحه بخور عتيقه

موسيقانا الكلاسيكية الخافته ..

لكن هذا العام ازدادت عليها بعض من دموع عيني

ترقرقت دون ارادتى عند تذكرى للحظات سعادة عشتها مع شخص لن اراه فى حياتى مجددا بسبب غبائك او غبائي.

لم افتقدها ولا اتمنى عودتها .. بل انى اندم انى عشتها معك انت .. وكنت اتمنى ان اعيشها مع ذلك الشخص الوحيد الذى ساعيش معه واقاسمه ما تبقى من عمرى

على فكرة .. انتى عسولة قوى يا دعاء

2011-08-08T01:09:00.000+02:00

حلوة قوى الجملة دى ...

بستطنى قوى النهاردة لما سمعتها من بنوته جديده جايا تعمل تدريب عندنا فى الشغل، اظاهر كده ان الناس مش بتعاملها كويس قوى او يمكن ما حدش بيتكلم معاها اصلا .. مش عارفه!!

اللى أعرفه ان وانا معديه قدامها سألتنى على حاجه فوقفت اتكلم معاها واشرحالها براحة

كانوا كلمتين صغيرين بس فى نهايه الحوار لقتها بتقولى

على فكرة .. انتى عسولة قوى يا دعاء

قلتلها ربنا يخليكي .. وانا مكسوفه قوى

قالتلى لا والله انتى عسولة قوى :$:$

انا اول مرة اشفها كانت النهاردة .. واول مرة نتكلم

ما عملتش معاها حاجه زيادة عن اللى بعمله مع غيرها ..

هى انا برخمتى وغلاستى وهزارى المعتاد .. دعاء يعني مش حد تانى

بس كلمتها عدت من على ودانى ودخلت قلبى على طول

اصله الواحد مننا اكيد بيفرح قوى " فرحه العيل الصغيربلبس العيد" لما حد يقول فيه كلمتين حلوين

هو صحيح انا مش مستنيه حد يقول فيا اى حاجه ..

يعني ما اتعودتش استنى لانى لو استنيت ممكن استنى كتير وكتر الانتظار يجبلى احباط وماحدش يقول بم حتى يجبر بيها خاطرى

بس لما بتيجي الكلمة الحلوة فجأة كده ولوحدها من غير ما اكون مستنيها "على حين غره يعني" بفرح قوى بيها .. وبيبقى فعلا ليها طعم حلو